Авиакеросин нархи рекорд даражада қимматлади

Петербург биржасида авиация керосини нархи рекорд даражага – бир тоннаси учун 120 минг рублдан ортиқроққа кўтарилди. Бу ҳақда биржа маълумотларига таяниб, “Ведомости” нашри хабар берди.

20 августдаги савдолар якунларига кўра, авиаёқилғи қиймати бир тонна учун 121 864 рублни ташкил этган. Газетанинг қайд этишича, аввалги рекорд май ойида қайд этилган – қарийб 90 минг рубль. Йил бошидан бери авиакеросин нархи 1,6 бараварга қимматлашган.

Биржадан ташқари савдоларда ҳам нархлар ўсишда давом этмоқда: шу ҳафтада улар бир тонна учун 110 минг рублгача етган, энг юқори кўрсаткич эса июль ойи бошида қайд этилган – қарийб 117 минг рубль.

Ёқилғи нархи жорий йилнинг март ойидан ўса бошлаган. Ўшанда бунга Яқин Шарқдаги қуролли низо фонида экспортнинг ортиши сабаб бўлган, бу эса жаҳондаги нархларининг кўтарилишига олиб келган. Кейинчалик, нархларнинг кескин ошишига қўшимча омил сифатида Украинанинг Россиядаги нефтни қайта ишлаш корхоналарига берган зарбалари хизмат қилган. Бу ҳолат мамлакатда нархларнинг ўсишига ва ёқилғи инқирозига сабаб бўлмоқда.

Ушбу вазият фонида жорий йил 1 июндан бери ва камида 30 ноябргача Россияда авиакеросин экспортига тақиқ амал қилмоқда. Шунга қарамай, бундай шароитда ҳам авиакомпаниялар самолётларга ёқилғи қуйишда қийинчиликларга дуч келмоқда. Нархларнинг жорий ўсишини “Ведомости” нефтни қайта ишлаш заводларидаги таъмирлаш ишлари сабабли бозорда авиаёқилғи ҳажмининг чеклангани ва етказиб бериш логистикасининг мураккаблашгани билан изоҳлайди.

Эслатиб ўтамиз, аввалроқ Россияда бензин ва авиация керосини экспортига вақтинчалик тўлиқ тақиқ жорий этилгани ҳақида хабар берилган эди.