Ассоциация Катанец даврида Клинсманнга шартнома таклиф қилгани маълум бўлди

Ўзбекистон футбол ассоциацияси 2024 йил ноябрь ойида, миллий терма жамоага Сречко Катанец бош мураббийлик қилиб турган вақтда, ундан яширин равишда Юрген Клинсманнга шартнома таклиф қилгани маълум бўлди. Бу ҳақда миллий терма жамоанинг собиқ раҳбарларидан бири Шерзод Эгамбердиев маълум қилди.

Эгамбердиев маълум қилишича, 2024 йил ноябрь ойидаги ўйинлардан кейин Катанец Тошкентга келиб, жамоанинг 2025 йил март ойидаги учрашувларга тайёргарлик режасини тасдиқлади ва терма жамоа билан қолишини, ҳеч қаерга кетиш нияти йўқлигини айтган. 

Бироқ, ўша йилнинг декабрь ойида унга Юрген Клинсманн қўнғироқ қилиб, Ўзбекистон футбол ассоциацияси унга Ўзбекистон терма жамоаси бош мураббийи лавозимини таклиф қилганини айтган. Ваҳоланки, ўша вақтда бу лавозимда ҳали ҳам Катанецнинг ўзи ишларди. Катанец бу гапга ишонмаганидан сўнг, Клинсманн унга ассоциация томонидан юборилган тайёр шартнома нусхасини юборган.

Маълумот учун, 2025 йил январь ойида Сречко Катанец соғлиғидаги муаммолар сабаб ЎФА билан тузилган шартномани ўзаро келишув асосида тугатганди. Кейинчалик унинг ўрнига Темур Кападзе терма жамоа бош мураббийи этиб тайинланган.