Аслида йўқ автомобилларни қарийб 5 млрд сўмга пуллаган шахс қамалди

Юзлаб фуқароларни Telegram орқали алдаб, 4 миллиард 800 миллион сўмдан ортиқ моддий зарар етказган шахс 5 йил 1 ой муддатга озодликдан маҳрум этилди. Бу ҳақда Ички ишлар вазирлиги хабар берди.

Қайд этилишича, 1999 йилда Қашқадарё вилоятининг Ғузор туманида туғилган М.А. Telegram мессенжерида “Ёлғиз бўри” номли аккаунт очган. У автомобиль савдосига алоқадаор каналларда ўзига тегишли бўлмаган қимматбаҳо автомобилларни сотаётгандек эълонлар жойлаштирган. Хусусан, автомобилларни бозор нархидан анча арзонга харидорларга таклиф қилган. У ўз ишини ишончли кўрсатиш учун автомобилларнинг ишлаб чиқарилган йили, юрган масофаси, техник ҳолати каби батафсил тавсифларни келтирган.

“Осон пул топиш деган нарса – ўзингизга тегишли бўлмаган нарсаларни сотасиз. Осон пул, масалан, “заклад” ҳисобида. 10 минг долларлик ёки 5 минг долларлик нарсани қўясиз. Қарабсизки, 10-20 дақиқа вақтингиз кетади. Йўқ жойдан 5-6 миллион пул келади. Ҳаммаси виртуал”, дейди у.

Унинг айтишича, автомобилларни салонлардаги 80–90 минг доллар атрофидаги нарх ўрнига 50 минг долларга таклиф қилган. Арзон нархни кўрган фуқаролар бунга ишониб, машинани сотиб олиш мумкин деб ўйлаган. Потенциал харидорларга эса 2000 доллардан 5000 долларгача миқдорда “заклад” бериши кераклигини айтган. Пул маблағлари учинчи шахслар номига расмийлаштирилган виртуал ҳисоблар ва аккаунтларга ўтказилгач, жиноятчи алоқани узган ва ёзишмаларни ўчириб ташлаган.

“Қилган ишларимдан пушаймон бўлдим. Ўша мен алдов йўли билан олган инсонлар ўша пулларни яхши кунларига ишлатиш учун, машина олиш учун, уй-жой қуриш учун фарзандларига тўй қилиш учун ишлатмоқчи бўлган пулларини алдов йўли билан олиб қўйдим. Улардан кечирим сўрайман. Қилган ишимдан пушаймонман”, дейди у.

Суд ҳукми билан эркак Жиноят кодексининг 168-моддасида (фирибгарлик) назарда тутилган жиноятни содир этганликда айбдор деб топилиб, 5 йил 1 ой муддатга озодликдан маҳрум этилган.

Эслатиб ўтамиз, аввалроқ ижтимоий тармоқлар орқали Божхона қўмитаси номидан сохта саҳифалар очиб, фуқароларнинг пулларини ўзлаштириб келган жиноий гуруҳ қўлга олинганди.