“Арсенал” “Тоттенхэм”ни доғда қолдириб, Эзени илиб кетди

Англиялик ярим ҳимоячи Эберечи Эзе “Кристал Пелас”дан Лондоннинг “Арсенал” клубига ўтмоқда. Бу ҳақда инсайдер Фабрицио Романо маълум қилди.

Романонинг сўзларига кўра, келишув шартлари келишиб олинган. “Канонирлар” 27 ёшли Эзе учун 60 миллион фунт тўлайди. Олдинроқ Эзе худди шундай пул эвазига “Тоттенхэм”га ўтишга бир қадам қолгани хабар қилинганди.

“Тоттенхэм” Эзени қўлга киритиш учун нақд пул ва Ричарлисонни шартномага қўшиб бериш вариантини муҳокама қилаётган бир пайтда, “Арсенал” 60 миллион фунтлик таклифи билан рақиб режаларини яшин тезлигида бузиб ташлади.

Аслида “топчилар” ёз бошида ҳам Эзега қизиққанди. Аммо Этан Нванери билан шартнома узайтирилгач ва Нони Мадуэке 48,5 млн фунт эвазига олиб келингач бу трансфер масаласи ёпилган деб ўйлашганди. Ҳаверцнинг жароҳати эса ҳаммасини ўзгартирди ва “Арсенал” рақибини ҳайратда қолдирган ҳолда ҳужумни кучайтиришга қарор қилди.

Ўтган мавсумда 27 ёшли Эзе барча турнирларда 43 та ўйинда қатнашиб, 14 та гол урди ва 11 та голли узатмани амалга оширди. Эзенинг “Кристал Пелас” билан амалдаги шартномаси 2027 йилнинг ёзига қадар тузилган.

“Transfermarkt” порталида берилган маълумотларга кўра, футболчининг бозор қиймати 55 миллион еврони ташкил қилади.

Жаҳонгир Болтабоев