“Арсенал” Бельгия сафарида йирик ҳисобдаги ғалабага эришди

Кеча, 10 декабрь куни UEFA Чемпионлар Лигаси 6-тур доирасида жадвал пешқадами “Арсенал” Бельгияга сафар қилди. Учрашувда Микель Артета шогирдлари мезбон “Брюгге”ни йирик 3:0 ҳисобида мағлуб этди.

Ўйин деярли тўлиқ “Арсенал” назоратида кечди. 25-дақиқада Субимендининг аниқ узатмасидан сўнг Нони Мадуэке ҳисобни очди ва лондонликлар биринчи бўлимни 1:0 ҳисобида якунлади.

Иккинчи бўлим ҳам меҳмонларнинг фаол ҳужумлари билан бошланди. 47-дақиқада Нони Мадуэке дублни расмийлаштириб, ҳисобни 2:0 га кўринишига етказди. 56-дақиқада эса Габриэл Мартинелли тўпни дарвозага йўллаб, натижани йирик кўринишга олиб келди. Якунда “Арсенал” 3:0 ҳисобидаги ишончли ғалабани қўлга киритди.

Шу тариқа, “Арсенал” Чемпионлар Лигаси 6-туридан сўнг 100 фоизлик натижа билан жадвалда 1-ўринни эгаллаб турибди. “Брюгге” эса 4 очко билан 30-поғонани банд этган.

Навбатдаги турда лондонликлар Миланда “Интер”га қарши майдонга тушади, “Брюгге” эса Қозоғистоннинг “Қайрат” жамоаси майдонига сафар қилади.