Аргентина футбол раҳбари суд қилинади

Аргентина футбол ассоциацияси раҳбари Клаудио Тапию ижтимоий таъминот бадалларини тўламаганлик иши бўйича сўроқ қилиш учун чақирилди. Бу ҳақда “La Capital” нашри хабар берди.

Маълум қилинишича, судья Диего Амаранте Аргентина футбол ассоциацияси раҳбари Клаудио Тапию ҳамда ассоциация хазиначиси Пабло Товигинони ижтимоий суғурта бадалларини тўламаганлик бўйича сўроқ қилишга чақирган. Шунингдек, уларга мамлакатдан чиқиб кетиш тақиқи қўйилган.

Тапиюнинг сўроқ қилиниши жорий йилнинг 5 март куни бўлиб ўтади. Прокуратура уни 13 миллион АҚШ долларидан ортиқ ижтимоий суғурта бадалларини тўламаганликда айбламоқда.

2025 йил декабрь ойида Аргентинада футбол ассоциацияси билан боғлиқ коррупция можароси авж олди. Гумонлар юқори лавозимли шахслар – Клаудио Тапию, унинг яқин ҳамкори Пабло Товигино ҳамда ташкилотнинг молия бўйича ўринбосари Лусиано Накисага қаратилган.

Тергов доирасида Пилар шаҳрида жойлашган 10 гектарлик ер майдони, ундаги вертолёт майдончаси, от фермаси ва 50 дан ортиқ ретро автомобилларга эгалик қилиш ҳолатлари ҳам ўрганилмоқда.

Декабрь ойи ўрталарида Аргентинанинг собиқ хавфсизлик вазири, сенатор Патрисия Буллрич Жанубий Америка футбол конфедерациясига мурожаат қилиб, Тапию фаолиятини текширишни талаб қилган.

Унинг таъкидлашича, реклама даромадларининг қандай сарфланаётгани, маҳаллий чемпионатларда ғалаба учун ажратиладиган мукофот пуллари нега Тапиюнинг хорижий сафарлари харажатларидан камлиги, шунингдек клубларнинг қарзларини ким ва қандай бошқараётгани каби масалалар атрофлича текширилиши лозим.