Анвар Садатни ўлдириш сценарийси бўйича Эрдўғанни ўлдириш режалаштирилгани айтилди

Туркияда тақиқланган ва террорчи ташкилот деб эълон қилинган Фатҳуллоҳ Гулен бошчилигидаги ФЕТО ташкилоти 2016 йил июль ойида давлат тўнтаришига уринишдан олдин ва ўша вақтнинг ўзида ҳам Президент Ражаб Тойиб Эрдўғанга бир неча бор суиқасд қилишга ҳаракат қилган. Бу ҳақда маҳаллий “Türkiye” газетаси ёзди. 

Ўз вақтида Мудофаа вазирлигининг киберхавфсизлик масалалари учун масъул бўлган истеъфодаги бригада генерали Иброҳим Буюкбошнинг нашрга айтишича, дастлаб Эрдўғанга суиқасд қилиш машғулотлар пайтида режалаштирилган, бироқ махсус хизматлар бир қатор шубҳали ҳолатларни қайд этган ва Президентнинг машғулотларда иштирок этиш дастури бекор қилинган. Кейинчалик хавфсизлик кучлари Эрдўғанни 1981 йилда Миср Президенти Анвар Садатга қарши ҳарбий парадда уюштирилган суиқасдга ўхшаб ўлдиришни режалаштиргани ҳақида маълумот олган. 

Туркия етакчисига навбатдаги суиқасд 2016 йил 15 июлга ўтар кечаси уюштирилди, бироқ Эрдўған Мармарис курортидаги меҳмонхонани олдиндан тарк этгач, бу уриниш ҳам барбод бўлди. Туркиялик истеъфодаги ҳарбийнинг сўзларига кўра, ФЕТО Эрдўғанни хорижий авиакомпания самолётида ўлдириш режасини тузган

2016 йил 15 июлда Туркияда давлат тўнтаришига уриниш оқибатида 253 киши ҳалок бўлди, 2,2 минг киши жароҳатланди. Тўнтариш бостирилгандан сўнг, Туркия ҳукумати давлат тузилмаларида тозалашлар ўтказди, 100 мингдан ортиқ киши ишдан бўшатилди. Қўзғолоннинг юзлаб иштирокчилари умрбод қамоқ жазосига ҳукм қилинди. Эрдўған аввалроқ Туркия ФЕТО тарафдорларини уларнинг охиргиси жавобгарликка тортилмагунча таъқиб қилишини айтган эди.

Анвар Садатнинг ўлдирилиши

Мисрни 1970 йилдан 1981 йилгача бошқарган Президент Анвар Садатга суиқасд 1981 йил 6 октябрь куни Қоҳирада, 1973 йилги “Октябрь уруши” (Суэц каналидан ўтиш)нинг 8 йиллигига бағишлаб ўтказилган ҳарбий парад пайтида амалга оширилган.

Суиқасд ташкилотчиси – Миср армияси лейтенанти ва радикал “Миср Исломий Жиҳоди” гуруҳи аъзоси Холид ал-Исломбулий бошчилигидаги фитначи ҳарбийлар гуруҳи эди.

Президент Анвар Садат ва юқори мартабали меҳмонлар (вазирлар, чет эл дипломатлари) марказий трибунада парадни кузатиб ўтирган эди. Шу пайт осмонда Миср Ҳарбий-ҳаво кучларининг “Мираж” қирувчи самолётлари кўргазмали парвозларни бажараётган эди. Сиёсатчилар ва томошабинларнинг диққати осмонга қаратилган.

Соат 13:00 атрофида трибуна олдидан оғир артиллерия тортаётган ҳарбий юк машиналари ўта бошлайди. Машиналардан бирининг ичида лейтенант Холид ал-Исломбулий ва унинг 3 нафар қуролдоши бўлган. Улар ҳайдовчини қурол ўқталиб, машинани тўхтатишга мажбур қилишади.

Машина тўхташи билан ичидан ҳарбий либосдаги тўрт киши отилиб чиқади. Ал-Исломбулий трибуна томон югуриб келиб, қўл гранатасини улоқтиради (лекин граната портламайди). Қолган фитначилар эса автоматик қуроллардан (Калашников) трибунани ўққа тута бошлайди.

Анвар Садат ҳужумни ҳарбийларнинг салом бериш маросими деб ўйлаб, уларни қарши олиш учун ўрнидан туради. Шу заҳоти унга бир нечта ўқ тегади. Президентнинг соқчилари ва ёрдамчилари уни стуллар билан ёпишга ва ҳимоя қилишга ҳаракат қилади, аммо кеч бўлган эди.

Ҳужум тахминан 2 дақиқа давом этган. Ҳужумчиларнинг ўқлари тугагач, хавфсизлик кучлари уларга қарата ўт очади. Фитначилардан бири ўлдирилади, аъзолари (шу жумладан Исломбулий) ярадор ҳолда қўлга олинади.

Анвар Садат оғир яраланиб, зудлик билан вертолётда ҳарбий госпиталга олиб кетилади, аммо шифокорлар унинг ҳаётини сақлаб қола олишмайди. Теракда Садатдан ташқари яна 10 дан ортиқ киши (шу жумладан бир нечта хорижий дипломатлар) ҳалок бўлади, 28 киши яраланади. Ўшанда Садатнинг ёнида ўтирган вице-президент Ҳасни Муборак енгил жароҳат олади ва кейинчалик давлат раҳбарига айланади.