Анри футболчиларни FIFA’даги вазиятга аралашишга чақирди

“Арсенал” клуби ва Франция терма жамоасининг собиқ ҳужумчиси Тьерри Анри профессионал футболчиларни жаҳон футболидаги муҳим қарорларга таъсир ўтказишга чақирди. Бу ҳақдаги фикрларни Анри CBS телеканалидаги дастурларнинг бирида айтиб ўтди.

Француз собиқ футболчи бу фикрни FIFA ва ташкилот президенти Жанни Инфантино атрофидаги сўнгги можаролар фонида билдирган.

“Менимча, футболчилар ўзлари ўйлагандан кўра кўпроқ кучга эга. Агар улар бирор нарсани ўзгартиришни истаса, буни амалга оширишлари мумкин, айниқса ҳозирги даврда”, дейди Анри.

Унинг айтишича, футболчилар кўпинча ўз фаолияти ва мусобақалар ташкил этилишига бевосита таъсир қиладиган қарорлар муҳокамасидан четда қолади. Бироқ улар биргаликда ҳаракат қилса, ўз талабларини футбол ташкилотларига қабул қилдириш имконияти юқори.

Анри АҚШдаги спорт лигаларини мисол қилиб, NBA ва NFL’да спортчилар бирор масала бўйича қатъий позиция билдирса, лига раҳбарияти уларнинг фикрини инобатга олишини қайд этган.

“Баъзида футболчилар ўзларида қандай катта таъсир борлигини англамайди ёки ундан фойдаланмайди. АҚШда эса буни яққол кўриш мумкин: футболчилар бирор нарсани талаб қилса, лига уларни тинглайди”, дейди футболчи.

Анрининг баёнотлари FIFA президенти Жанни Инфантино атрофидаги босим кучайган бир пайтга тўғри келган. Сўнгги ҳафталарда FIFA’нинг 2026 йилги Жаҳон чемпионати тижорий ҳуқуқлари билан боғлиқ режалари ва ташкилот раҳбарияти фаолияти юзасидан танқидлар кучайган, UEFA эса Инфантино фаолияти билан боғлиқ ҳуқуқий чораларни кўриб чиқмоқда.

Эслатиб ўтамиз, аввалроқ FIFA UEFA’ни FIFA раҳбариятига қарши туҳмат кампанияси олиб боришда айблаганди.