Андижон вилоят ҳокимининг собиқ ўринбосари озодликка чиқди

Ўзганинг мулкини ўзлаштириш ёки растрата қилиш йўли билан талон-торож қилишда айбланиб 7 йилга қамалган Андижон вилоят ҳокимининг собиқ ўринбосари Ботиржон Ҳамроевнинг жазоси енгиллаштирилди. Бу ҳақда Тошкент шаҳар суди матбуот хизмати хабар берди.

Қайд этилишича, жиноят ишлари бўйича Юнусобод туман суди томонидан мансаб ваколатини суиистеъмол қилиш, ўзганинг мулкини ўзлаштириш ёки растрата қилиш йўли билан талон-торож қилиш ва бошқа жиноятларни содир этганликда айбланган жами 29 нафар судланувчига оид жиноят иши кўрилиб, суднинг 2025 йил 8 июлдаги ҳукми билан тегишли жазолар тайинланган.
 
2025 йилнинг 26 декабрь куни суд ҳукмига нисбатан туман прокурорнинг протести ва судланувчиларнинг шикоятларига асосан жиноят иши Тошкент шаҳар суди апеллецияси инстанциясида кўрилиб, ҳукмнинг  24 нафар судланувчига тегишли қисмлари ўзгартирилган. 

Хусусан, биринчи инстанция суди ҳукми билан Ботиржон Ҳамроевга нисбатан тайинланган 3 йил муддатга муайян ҳуқуқдан маҳрум этилган ҳолда 7 йил муддатга озодликдан маҳрум қилиш жазоси (у Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми “а”, “в” бандлари билан айбдор деб топилган) жиноят оқибатида етказилган зарар қоплангани муносабати билан иш ҳақининг 20 фоизини давлат даромадига ундириб бориш шарти билан 2 йил 6 ой муддатга ахлоқ тузатиш ишлари жазосига ўзгартирилган. 

Жиноят кодекси 167-моддасининг 5-қисмига кўра, етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди.

Билдирилишича, Ботиржон Ҳамроевга нисбатан тайинланган муайян ҳуқуқдан маҳрум қилиш жазоси ўзгаришсиз қолдирилган. Ажримдан норози тарафлар тафтиш тартибида шикоят ёки протест билдириш ҳуқуқига эга.