Анчелотти Италия терма жамоасини бошқаришдан бош тортди

Бразилия терма жамоаси бош мураббийи Карло Анчелотти Италия терма жамоасини бошқариш таклифини рад этди. Бу ҳақда “Globo” нашри хабар берди.

Аввалроқ, Италия футбол федерацияси (FIGC) техник директори Паоло Мальдини ташкилот Анчелотти ва испаниялик мутахассис Хосеп Гвардиола билан боғланиб, уларнинг Италия терма жамоасини бошқариш имкониятини ўрганганини маълум қилган эди.

Маълумотларга кўра, федерация Анчелоттининг келгуси режалари ҳамда унинг шартномасини муддатидан олдин бекор қилиш учун тўланиши мумкин бўлган товон пули миқдори билан қизиққан. 

Мураббий FIGC вакилларига таклиф учун миннатдорлик билдирган, аммо Бразилия терма жамоасини тарк этиш нияти йўқлигини маълум қилган.

Жорий йилнинг 5 июль куни Бразилия терма жамоаси Жаҳон чемпионати 1/8 финалида Норвегияга 2:1 ҳисобида мағлуб бўлиб, сўнгги 36 йил ичида илк бор чорак финалга чиқа олмади. Турнирдан чиқиб кетганига қарамай, Анчелотти терма жамоадаги фаолиятини давом эттиришини билдирган.

67 ёшли Карло Анчелотти 2025 йил май ойида Бразилия терма жамоаси бош мураббийи этиб тайинланган. Бир йил ўтиб, у шартномасини 2030 йилги Жаҳон чемпионати якунига қадар узайтирди.

Эслатиб ўтамиз, аввалроқ испаниялик мутахассис Хосеп Гвардиола Италия терма жамоасини бошқариш учун йилига 20 миллион евро маош талаб қилгани ҳақида хабар берилганди.