Америка элчиси ўзбекистонликларни Қурбон ҳайити билан табриклади (видео)

АҚШнинг Ўзбекистондаги элчиси Жонатан Ҳеник ўзбекистонликларни Қурбон ҳайити билан қутлади.

“Қурбон ҳайитини нишонлар эканмиз, мен Ўзбекистон халқига ва дунёдаги мусулмонларга, шунингдек Америкадаги миллионлаб мусулмонларга ўз табригимни йўлламоқчиман”, дейди дипломат.

У Қашқадарё вилоятидаги Лангар ота масжидига бориб, ўз табригини ўша жойдан туриб йўллаган.

“Ушбу байрамни нишонлар эканмиз, чиройли жой бўлмиш Қашқадарёдаги муқаддас Лангар ота зиёратгоҳида туриб, ушбу табрикни йўллаш мен учун катта шараф”, дейди у.

Элчи бу ерга ҳатто америкаликлар ҳам тез-тез келишини айтган.

“Тарих, маданият ва динни қамраб олган ушбу маскан шу ердагиларнинг эътиқодини янада мустаҳкамлайди. Чикагодаги мусулмон оилалар ҳам байрам арафасида бу ерга келиб, турли таомлардан баҳраманд бўлади. Ўзим ва Америка халқи номидан байрам билан табриклайман. Сизга ва сизнинг оилангизга хурсандчилик ва саломатлик тилайман. Қурбон ҳайитингиз муборак бўлсин!” деган Ҳеник ўз табригида.

Эслатиб ўтамиз, аввалроқ Ўзбекистон Президенти Шавкат Мирзиёев мамлакат аҳолисини Қурбон ҳайити билан табриклаганди.