Венецияликлар АҚШ элчисини ҳайдаш мақсадида намойиш ўтказди

Италиянинг Венеция шаҳрида АҚШнинг Италиядаги элчиси Тилман Фертиттанинг суперяхтада шаҳарга етиб келиши муносабати билан юзлаб одамлар норозилик намойиши ўтказди. Намойишчилар АҚШ Президенти Дональд Трамп сиёсати ҳамда маҳаллий ҳокимият томонидан кучайтирилган хавфсизлик чораларини танқид қилди. Бу ҳақда “Reuters” хабар берди.

Фертитта, миллиардер тадбиркор ва Трамп томонидан тайинланган элчи, АҚШ мустақиллигининг 250 йиллиги муносабати билан ўтказилаётган “Freedom 250 Coastal Diplomacy Tour” доирасида 117 метрлик “Boardwalk” суперяхтасида Италия бўйлаб сафар қилмоқда.

Маълум қилинишича, тахминан 300 нафар намойишчи “Фертитта кетсин”, “Америка кетсин”, “Венециядан фойдаланманг” ва “Миллиардерларга жой йўқ” деган шиорлар ёзилган плакатлар билан юриш қилган. Улар Фертиттанинг яхтаси тўхтаган Рива дей Сетте Мартири соҳилига яқинлашган, аммо полиция уларни тўхтатган. Бу жараёнда айрим енгил тўқнашувлар ҳам юз берган.

Намойишчилар, шунингдек, Фаластин халқини қўллаб-қувватлашини билдириб, Исроилни Ғазода геноцид содир этаётганликда айблаган.

Тугбук ҳамроҳлигидаги оқ рангли суперяхта Венециянинг асосий сайргоҳларидан бири бўлган Рива дей Сетте Мартирига, Сан-Марко майдонидан тахминан бир километр узоқликдаги соҳилга келиб тўхтаган. Шаҳар маъмурияти норозилик акциялари машҳур Festa del Redentore байрами билан бир вақтга тўғри келиши сабабли хавфсизлик чораларини кучайтирган. Мазкур қадимий байрам вабо эпидемияси тугаганини нишонлашга бағишланган бўлиб, унда минглаб маҳаллий аҳоли ва сайёҳлар мушакбозлик ҳамда диний маросимлар қилади.

Намойиш ташкилотчилари, жумладан Morion ижтимоий маркази, Фертиттани Трамп сиёсатининг вакили деб ҳисоблашини билдирган. Уларнинг фикрича, бу сиёсат халқаро можароларни кучайтирмоқда, Исроилнинг Ғазодаги ҳарбий амалиётларини қўллаб-қувватламоқда ҳамда жаҳон иқтисодий беқарорлиги ва нархларнинг ўсишига олиб келмоқда.

Италиянинг “Яшиллар ва сўл иттифоқи” (AVS) эса ҳукуматни жамоат хавфсизлиги вазифаларига жалб қилиниши керак бўлган юзлаб полиция ходимларини Фертиттанинг Италия бўйлаб сафари давомида уни “қўриқлаш” учун сафарбар этганликда танқид қилган ва тарафдорларини АҚШ сиёсатига қарши намойишларга қўшилишга чақирган.

Маълумот ўрнида, Венеция аҳолиси узоқ йиллардан бери оммавий туризм ва шаҳарнинг йирик тадбирлар учун майдон сифатида қўлланилишидан норози бўлиб келади. Жумладан, 2025 йил июнь ойида Amazon асосчиси Жефф Безос ва журналист Лорен Санчеснинг тўйи ҳам шу ерда ўтказилган эди.

Эслатиб ўтамиз, сўнгги ойларда Трамп ва Италия Бош вазири Жоржа Мелони ўртасидаги бир қатор очиқ келишмовчиликлар, хусусан, Трампнинг Мелони G7 саммитида у билан суратга тушишни “илтимос қилгани” ҳақидаги иддаосини у қатъий рад этганидан кейин, икки томон муносабатлари совигани ҳақида гап-сўзлар кучайган эди. Фертитта эса бундай қарашларни рад этиб, Трамп ва Мелони ўртасида мустаҳкам шахсий муносабатлар сақланиб қолаётганини таъкидлаган.