Амалдаги чемпион “Australian Open”ни тарк этди

Амалдаги чемпион, америкалик теннисчи Мэдисон Киз Мельбурнда ўтаётган Австралия очиқ чемпионатининг тўртинчи босқичида ватандоши Жессика Пегулага мағлуб бўлиб, мусобақани тарк этди.

Учрашув 1 соат 18 дақиқа давом этди. Баҳс икки сет натижасига кўра 6/3, 6/4 ҳисобида якунланди ва жаҳон рейтингида 6-ўринни эгаллаб турган Пегула ғолиб бўлди. Мэдисон Киз эса дунё рейтингида 9-ўринда туради. Икки теннисчи ҳам мусобақада сараланган иштирокчилар сифатида қатнашган. 

Пегула кейинги босқичда мавсумнинг илк “Катта дубулға” турнири ярим финали йўлланмаси учун хитойлик Ван Синьюй  ва америкалик Аманда Анисимова (4-рақам) ўртасидаги учрашув ғолиби билан баҳс олиб боради.

Эслатиб ўтамиз, аввалроқ Ўзбекистон терма жамоасининг аъзоси Полина Кудерметова мусобақанинг иккинчи даврасида даниялик 23 ёшли Клара Таусонга имкониятни бой бериб, турнирдаги иштирокини якунлаган эди. Шунингдек, Ўзбекистон терма жамоасининг аъзоси Камилла Раҳимова “Australian Open” биринчи даврасида дунёнинг учинчи ракеткаси, америкалик Коко Гоффга имкониятни бой берди ва мусобақадаги иштирокини якунлаганди.