Алкоголь истеъмоли ақлий заифликка чалиниш хавфини оширади – тадқиқот

Спиртли ичимликларни исталган миқдорда истеъмол қилиш деменция (ақлий заифлик) хавфини оширади. Бу ҳақда “BMJ Evidence-Based Medicine” журналида чоп этилган тадқиқотда сўз боради.

Тадқиқот шуни кўрсатдики, қанча кўп спиртли ичимлик истеъмол қилинса, деменция ривожланиш хавфи шунчалик юқори бўлади. Алкоголь одамларнинг нейродегенератив ҳолатга генетик мойиллигидан қатъи назар деменция ривожланиш хавфини оширади.

Шунингдек, ўрта миқдорларда спиртли ичимлик истеъмол қилиш ҳам соғлиқ учун хавф туғдириши мумкин. 

“Ичишга қарор қилган ҳар бир киши учун тадқиқотимиз шуни кўрсатадики, спиртли ичимликларни кўпроқ истеъмол қилиш деменция ривожланишининг юқори хавфига олиб келади”,  дейди Кембриж университети таҳлилчиси Стивен Бёржесс ўз баёнотида.

Тадқиқот давомида Буюк Британия ва АҚШда бир неча йил 560 000 га яқин одам кузатилган. Унинг биринчи қисмида олимлар одамлардан қанча миқдорда алкоголь ичишларини сўрашган, сўнгра спиртли ичимликлар ва деменция хавфи ўртасидаги боғлиқликни аниқлаган. Шунингдек, улар бу билан боғлиқ генетик белгиларни таҳлил қилиб, унинг одамлар ҳаёти давомидаги таъсирини ҳисобга олишган.

Қайд этилишича, алкоголь билан боғлиқ генетик хавфлар қанчалик юқори бўлса, деменция хавфи шунчалик юқори бўлади. Масалан, агар одам ҳафтада уч марта алкоголь ичса, деменция билан касалланиш эҳтимоли ҳафтада бир марта ичадиган одамга қараганда 15 фоизга юқори бўлади.

Эслатиб ўтамиз, аввалроқ Жаҳон соғлиқни сақлаш ташкилоти бугунги кунда бутун дунёда 1 миллиарддан ортиқ одам руҳий саломатлик бузилиши билан яшаётганини маълум қилган эди. Хусусан, ЖССТ ҳисоб-китобига кўра, 2021 йилда 15 ёшдан ошган 400 миллион киши спиртли ичимлик истеъмоли билан боғлиқ бузилишлардан азият чеккан, 2022 йилда эса 64 миллиондан ортиқ одам гиёҳванд моддалар истеъмоли оқибатида руҳий бузилишларга йўлиққан. 2021 йилда қарийб 57 миллион одам деменция, 24 миллиондан ортиғи эса эпилепсия касаллигидан азият чеккан.

Дилбар Шоакромова