Алишер Усмонов ХОҚ президенти томонидан мукофотланди

Швейцариянинг Лозанна шаҳрида Халқаро қиличбозлик федерациясининг Конгресси бўлиб ўтди. Унда дунёнинг 150 дан ортиқ мамлакати вакилларидан 300 делегат иштирок этди. Конгрессда Халқаро Олимпия қўмитаси президенти Томас Бах ҳам қатнашиб, ХОҚ президенти қиличбозликнинг барча 12 йўналишини ҳам Олимпия ўйинлари дастурига киришида улкан ҳисса қўшган таниқли ўзбек миллиардери Алишер Усмоновни ХОҚнинг махсус совғаси билан тақдирлади.

Мазкур тадбирда МОҚ президенти, Марказий Осиё ва Ўзбекистон қиличбозлик федерацияси раиси Рустам Шоабдураҳмонов ва Ўзбекистон қиличбозлик федерацияси бош котиби Гулнора Саидова ҳам иштирок этди.

Конгресс доирасида йил якунлари бўйича ҳам қатор номинациялар бўйича тақдирлаш маросими бўлиб ўтказилди. Унга кўра, қуйидаги йўналишда совринлар топширилди:

“Fair Play Trophy”: Сабля бўйича Венгрия терма жамоаси вакиллари Тамаш Дечи, Чанад Гемеси, Андраш Сатмари, Арон Сцилагьи ва франциялик Боладе Апитига.

Катталар ва ёшлар ўртасида рейтинг ғолиблари:

Шпага. Катталар ўртасида жамоавий: Россия (аёллар ва эркаклар). Яккалик: Ман Вай Вивиан Конг (Гонгконг) ва Казуясу Минобе (Япония).

Ёшлар ўртасида: Россия (аёллар) ва Венгрия (эркаклар). Яккалик: Федерика Изола ва Давиде Ди Вероли (иккаласи ҳам Италия).

Рапира. Катталар ўртасида жамоавий: Россия (аёллар) ва АҚШ (эркаклар). Яккалик: Инна Дериглазова (Россия) ва Алессио Фокони (Италия).

Ёшлар ўртасида: Италия (аёллар) ва Россия (эркаклар). Яккалик: Мартина Фаваретто (Италия) ва Моҳаммед Ҳамза (Миср).

Сабля. Катталар ўртасида жамоавий: Франция (аёллар) ва Корея Республикаси (эркаклар). Яккалик: Ольга Харлан (Украина) ва Сангхук Ох (Корея Республикаси).

Ёшлар ўртасида: Германия (аёллар) ва Италия (эркаклар). Яккалик: Йоана Илиева (Болгария) ва Лоренцо Рома (Италия).

Миллатлар Гран-приси: Россия ва Италия.

Шунингдек, мазкур Конгресс давомида Кабо-Верде, Кения, Оман ва Папуа-Янги Гвинея каби мамлакатлар Халқаро қиличбозлик федерациясига аъзо бўлди. Шу тариқа халқаро ташкилотга аъзо мамлакатлар сони 157 тага етди.

Конгрессда халқаро федерациянинг ортда қолган вақт мобайнида олиб борган ишлари, жорий йил бўйича молиявий ҳисобити ва келаси йил учун ажратилган бюджети тўғрисида ҳисобот тингланди. Шунингдек, 2021 йил катталар ўртасидаги жаҳон чемпионатига мезбонлиги учун ўтказилган овоз беришда Миср мамлакати номзоди маъқулланди. Қолаверса, 2020-2024 йиллар оралиғидаги халқаро мусобақаларда жаҳон ва Олимпиада чемпионларининг баҳсларда ажралиб туриши учун уларнинг спорт кийимига исм-фамилиясини қизил ва олтин рангларда ёздириб қўйиш бўйича қарор қабул қилинди.