Алишер Усмонов “Эвертон”ни қайта сотиб олмоқчи – ОАВ

Россиялик тадбиркор Алишер Усмонов яна “Эвертон” клубига сармоя киритиш имкониятини кўриб чиқмоқда. У Ливерпуль жамоасига катта маблағ йўналтиришни ва клуб ишларига қайтишни истамоқда. Бу ҳақда “talkSPORT” нашри хабар берди.

Усмонов аввал клубнинг бевосита эгаси бўлмаган, бироқ “Эвертон”нинг собиқ асосий акциядори Фарҳод Мошири билан яқин бизнес ҳамкорлик алоқаларига эга эди. Мошири 2016 йилда клубнинг 49,9 фоизлик улушини сотиб олган ва кейинчалик ўз улушини 94,1 фоизгача оширган.

“Forbes” маълумотларига кўра, Усмоновнинг бойлиги 14 миллиард долларга баҳоланади. У аввалроқ Фарҳод Мошири билан бир вақтлар Лондоннинг “Арсенал” клубидаги 14,58 фоизлик улушга ҳам эгалик қилган.

Усмоновга тегишли USM Holdings компанияси 2017 йилда “Эвертон”нинг Финч-Фарм машғулот базаси номига ҳомийлик қилиш бўйича беш йиллик шартнома тузган. Шунингдек, Усмонов билан боғлиқ MegaFon компанияси клубнинг аёллар жамоасига ҳам ҳомийлик қилган. Бироқ 2022 йилда Россиянинг Украинага қарши уруши бошланганидан кейин клуб Усмонов билан боғлиқ компаниялар билан барча ҳомийлик келишувларини тўхтатган эди.

2024 йил декабрь ойида “Эвертон”нинг назорат пакети АҚШнинг “Фридкин Груп” компаниясига сотилди. Компания клубнинг 99,5 фоизлик улушини қўлга киритди.

Журналист Алан Бразилнинг айтишича, Усмоновнинг клубга қайтиш эҳтимоли ҳақида маълумотлар бор, аммо бу хабарни ҳозирча расман тасдиқлаб бўлмайди. Бундан ташқари, бизнесменга нисбатан Буюк Британияда жорий этилган санкциялар ва активларини музлатиш чоралари унинг клубга сармоя киритиш имкониятига таъсир қилиши мумкин.

Маълумот учун, ҳозирда “Эвертон” клуби эгаси – The Friedkin Group (TFG) жамоани сотишга қарор қилган.

Эслатиб ўтамиз, аввалроқ Америкалик миллиардер Илон Маск ҳам “Эвертон”ни сотиб олиш учун эҳтимолий номзод сифатида тилга олинаётгани ҳақида хабар берилганди.