Аламзада “Барса” Винисиз “Реал”га қарши: бугун “Эль-Класико” бўлади

Бугун, 25 октябрь куни Испания чемпионатининг 10-туридан ўрин олган марказий учрашувда “Барселона” ўз майдонида “Реал Мадрид”ни қабул қилади. “Эль-Класико” номи билан машҳур баҳс “Камп Ноу” стадионида бўлиб ўтади ва Тошкент вақти билан 01:00 да бошланади.

Учрашув бош ҳаками этиб Хавьер Альберола Рохас тайинланган. Тўққиз турдан кейин “Барселона” 27 очко билан турнир жадвалида биринчи ўринда бормоқда. Жамоа барча учрашувларда ғалаба қозонган. “Реал Мадрид” эса 21 очко билан учинчи ўринни эгаллаб турибди.

Каталонияликлар ҳафта ўртасида Чемпионлар лигаси доирасида ПСЖга 2:4 ҳисобида мағлуб бўлиб, мавсумдаги илк мағлубиятини қабул қилди. Шунга қарамай, “Барселона” Ла Лигада мавсумни тўққизта кетма-кет ғалаба билан бошлади. Энди жамоа чемпионат тарихида мавсум бошида кетма-кет ўнта ўйинда ғалаба қозонган илк клубга айланиш имкониятига эга. Каталонияликлар ўз майдонида Ла Лига доирасидаги сўнгги 23 та учрашувдан бери ғалаба қозониб келмоқда.

“Реал Мадрид” эса ҳафта ўртасида Чемпионлар лигасида “Лейпциг”ни 4:1 ҳисобида мағлуб этди. Жамоа сўнгги учта учрашувнинг ҳар бирида тўрттадан гол урди ва уларнинг барчасида ғалаба қозонди. Бироқ мадридликлар ички чемпионатда ҳозиргача икки марта мағлубиятга учрашга улгурди. Шунингдек, “Реал” Ла Лигадаги сўнгги учта сафар учрашувининг иккитасида мағлубиятга учради.

“Барселона” сафида Дани Олмо ПСЖга қарши ўйинда олган жароҳати сабаб “Эль-Класико”да майдонга тушмайди. Эрик Гарсия ҳам учрашувни ўтказиб юборади, Жюль Кунденинг иштироки эса сўроқ остида. “Реал Мадрид” ҳужумчиси Винисиус Жуниор чемпионатдаги тўртта ўйинга дисквалификация қилингани сабаб бу баҳсда ҳам қатнашмайди.

“Барселона” расмий мусобақалар доирасидаги сўнгги 7 та ўзаро учрашувнинг 6 тасида ғалаба қозонган. Бу орада каталонияликлар Ла Лигадаги аввалги чемпионлигини расмийлаштирган уй учрашувида ҳам “Реал”ни 2:0 ҳисобида мағлуб этган.

Жамоалар ўртасидаги сўнгги 13 та чемпионат учрашувининг бирортаси дуранг билан якунланмаган: “Барселона” 5 марта ғалаба қозонган, “Реал Мадрид” эса 8 марта устун келган.

Маълумот учун, бу икки жамоа ўзаро расмий учрашувларда 264 марта тўқнаш келган. Уларда “Реал Мадрид” 106 та ғалаба, “Барселона” ҳам 106 та ғалаба қайд этган, яна 52 та учрашув дуранг билан якунланган.