“Ал-Наср” футболчилари ойлик ололмаяпти – ОАВ

Саудия Арабистонининг “Ал-Наср” клуби молиявий қийинчиликларга дуч келгани сабабли жамоанинг айрим футболчилари июнь ойи учун белгиланган маошларининг бир қисмини ҳалигача ололмаган. Бу ҳақда “Arriyadiyah” нашри хабар берди.

Манбага кўра, клуб раҳбарияти қолган қарздорликни кейинроқ қоплашни режалаштирмоқда. Маблағ етишмаслиги туфайли “Ал-Наср” шартномаси якунланганидан сўнг жамоани тарк этган хорватиялик ярим ҳимоячи Марсело Брозовичнинг ўрнини босадиган хорижлик футболчини излаш жараёнини ҳам вақтинча тўхтатган.

Қайд этилишича, клуб молиявий вазиятдаги ноаниқлик сабаб ҳозирча бирор номзод билан расмий музокараларни бошламаган.

Шунга қарамай, “Ал-Наср” 2025-2026 йилги мавсум якунларига кўра, 2019 йилдан бери илк бор Саудия Арабистони чемпионлигини қўлга киритди.

Эслатиб ўтамиз, беш карра “Олтин тўп” соҳиби Криштиану Роналду 2023 йил январидан буён “Ал-Наср” сафида тўп суриб келмоқда.