АҚШнинг блокадасига қарамай Эрондан кемалар ўтишда давом этмоқда

АҚШ томонидан эълон қилинган блокадага қарамай Rich Starry танкери 14 апрель куни Ҳормуз бўғози орқали муваффақиятли ўтган. Бу ҳақда LSEG, MarineTraffic ва Kpler маълумотларига таяниб, “Reuters” хабар берди.

Маълум қилинишича, ушбу танкер ва унинг эгаси – SHANGHAI XUANRUN SHPG CO LTD Эрон билан ҳамкорлик қилгани сабабли АҚШ санкциялари остида.

Кема тахминан 250 минг баррель этанол ташиган. Юклаш Бирлашган Араб Амирликлари портларидан бирида амалга оширилган.

Нашрга кўра, бу АҚШ 13 апрель куни бошлаган денгиз блокадасидан кейин Ҳормуз бўғозидан ўтган биринчи кема ҳисобланади.

Шунингдек, яна бир санкциядаги танкер – Мурликишан танкер ҳам бўғоз томон йўл олган. Кутилишича, у 16 апрель куни Ироқда мазут юклайди. Аввал бу кема МКА номи билан Россия ва Эрон нефтини ташиган.

Эслатиб ўтамиз, аввалроқ АҚШ Президенти Дональд Трамп топшириғига биноан Америка ҳарбийлари Ҳормуз бўғозида расман блокада бошлаганди. Блокада кеча, 13 апрель куни АҚШнинг шарқий вақти билан соат 10:00 да кучга кирган.