АҚШдаги сайловларда беш мусулмон аёл сиёсатчи ғалаба қозонди

АҚШда жорий йилнинг 3 ноябрь куни ўтказилган оралиқ сайловларда келиб чиқиши Иордания, Фаластин, Сомали, Покистон ва Доминикан Республикасига бориб тақаладиган беш аёл сиёсатчи ғалаба қозонди.

Рува Ромман

Рува Ромман 1993 йилда Иорданияда туғилган, фаластинлик қочқинларнинг набираси. У 8 ёшида оиласи билан АҚШнинг Жоржия штатига кўчиб борган. Ромман сиёсий фаолиятини жамоатчиликни сайловларда иштирок этишга ундаш ва фуқаролик фаоллигини ошириш билан бошлаган. У Georgia Muslim Voter Project ҳамда Asian American Advocacy Fund ташкилотларида фаолият юритган, шунингдек, CAIR Georgia ташкилотида коммуникациялар бўйича директор бўлиб ишлаган.

2022 йилда у Жоржия штати Вакиллар палатасига сайланган илк мусулмон аёл ва штатда сайланган илк фаластинлик америкалик бўлган. 3 ноябрь кунги сайловда эса Жоржия штати Сенатининг 7-округи учун курашиб, дастлабки натижаларга кўра, 66 фоиз овоз билан ғалаба қозонди.

Рашида Тлаиб

Рашида Тлаиб 1976 йилда Мичиган штатининг Детройт шаҳрида туғилган. У фаластинлик муҳожирларнинг 14 фарзандидан энг каттаси. Ҳуқуқшунос бўлган Тлаиб 2008 йилда Мичиган штати қонунчилик органига сайланган илк мусулмон аёл сифатида тарихга кирган.

2019 йилдан буён АҚШ Конгресси Вакиллар палатасида Мичиган штатининг 12-округи вакили сифатида фаолият юритиб келмоқда. У корпорациялар фаолияти, экологик муаммолар, ижтимоий адолат ва аҳолининг турмуш шароитига оид масалаларни кўтариб келади. 3 ноябрь кунги сайловда республикачи Жеймс Хуперга қарши курашиб 76 фоиз овоз билан Конгрессдаги бешинчи муддатини қўлга киритди.

Илҳан Умар

Илҳан Умар 1982 йилда Сомали Демократик Республикасининг Могадишо шаҳрида туғилган. У болалигида оиласи билан мамлакатдаги уруш сабаб қочқин сифатида Кенияга кетган, кейинчалик АҚШга кўчиб борган. Умар 2018 йилда Конгрессга сайланиб, АҚШ Вакиллар палатасига кирган илк африкалик қочқин ва Миннесота штатидан сайланган илк қора танли аёл бўлган.

У Миннесота штатининг 5-конгресс округи вакили ҳисобланади. 3 ноябрь куни бўлиб ўтган сайловда республикачи Жон Нагелни мағлуб этиб, Конгрессдаги бешинчи муддатини қўлга киритди.

Марям Хон

Марям Хон Покистонда туғилган ва 1994 йилда болалигида оиласи билан АҚШга кўчиб борган. У махсус таълим йўналишида таҳсил олган, сиёсатга киришидан аввал ўқитувчи бўлиб ишлаган.

Хон 2022 йилнинг март ойида Коннектикут штати Вакиллар палатасига ўтказилган навбатдан ташқари сайловда ғалаба қозониб, ушбу палатага сайланган илк мусулмон вакил бўлган. У таълим, махсус эҳтиёжли болалар ҳуқуқлари ва жамоатчилик манфаатларига оид масалалар билан шуғулланган. 3 ноябрь кунги сайловда Коннектикут штати Сенатининг 2-округи учун курашиб, республикачи Тим Ноттсни мағлуб этди. Дастлабки натижаларга кўра, Хон 78,2 фоиз овоз тўплаган.

Дариализа Авила Шевалье

Дариализа Авила Шевалье – доминиканлик муҳожирлар оиласида туғилган афро-лотин сиёсий фаоли. У Нью-Йоркдаги Колумбия университетида таҳсил олган, жамоатчилик ташкилотларида фаолият юритган ва иммиграция масалалари билан шуғулланган. Кейинчалик ислом динини қабул қилган.

Шевалье сиёсий фаолияти давомида Фаластин ҳуқуқларини қўллаб-қувватлаган, ижтимоий тенглик, уй-жой масаласи ва муҳожирлар ҳуқуқларини ҳимоя қилиш билан шуғулланган. У Жорий йилнинг июнь ойида Демократик партия праймеризида Нью-Йоркнинг 13-конгресс округи бўйича амалдаги конгрессмен Адриано Эспайятни мағлуб этган. 3 ноябрь кунги умумий сайловда ҳам ғалаба қозонди.

Эслатиб ўтамиз, аввалроқ Демократик партия вакили Абдул ал-Саид Мичиган штати бўйича АҚШ Сенатига ўтказилган сайловда республикачи Майк Рожерс устидан ғалаба қозониб, мамлакат тарихида илк бор Сенатга сайланган мусулмон номзод бўлгани ҳақида хабар берилган эди.