АҚШдаги отишмада бир киши ҳалок бўлди

Кеча, 13 июль куни эрталаб АҚШнинг Мейн штати Биддефорд шаҳрида Иммиграция ва божхона назорати (ИБН) ходимлари иштирокидаги отишма оқибатида бир киши ҳалок бўлди. Бу ҳақда “DW” хабар берди.

Билдирилишича, воқеа юзасидан тергов ишлари бошланган.

Мейн штати Вакиллар палатаси спикери Райан Фекту ҳодиса ҳақида маълум қилиб, унда ИБН ходимлари қатнашганини билдирган.

“Бугун эрталаб Биддефордда отишма содир бўлди. Бир киши ҳалок бўлди. Бунга ИБН аралашган”, дея ёзган у ижтимоий тармоқлардаги саҳифасида.

Ҳозирча воқеанинг барча тафсилотлари очиқланмаган. АҚШ Федерал қидирув бюроси (ФҚБ) ҳодиса жойида иш олиб бораётганини билдирган, бироқ қўшимча маълумот бермаган.

Маълумотларга кўра, отишмага ҳайдовчининг ИБН ходимларига қарши автомобилидан фойдаланишга урингани сабаб бўлган.

Расмийларнинг айтишича, агентлар айнан шу ҳолатдан кейин ўқ узган. Бироқ воқеанинг барча тафсилотлари, жумладан, ходимларнинг ҳаракати қонуний бўлган ёки бўлмагани бўйича тергов давом этмоқда.

Мейн сенатори Ангус Кингнинг айтишича, Ички хавфсизлик вазири Марквейн Маллин унга воқеа вақтида ҳалок бўлган шахс ўз автомобилидан агентларга қарши қурол сифатида фойдаланишга урингани сабабли унга қарата ўқ узилганини маълум қилган.

Гувоҳларнинг сўзларига кўра, бир нечта ИБН ходими оқ рангли автомобилни ўраб олганидан сўнг, бир неча бор ўқ овози эшитилган.

Ҳуқуқ ҳимоячилари ҳалок бўлган шахс 26 ёшли Колумбия фуқароси эканини маълум қилган. У АҚШда ишлаш рухсатига эга бўлгани ва ижтимоий суғурта рақами мавжудлиги айтилмоқда.

Иммигрантлар ҳуқуқларини ҳимоя қилувчи Project Relief ташкилоти ҳам ҳодиса вақтида ўз жамоаси аъзоларидан бири ҳалок бўлганини билдириб, унинг оиласи билан алоқада эканини маълум қилган.

Мейн губернатори Жанет Миллс эса федерал ҳуқуқни муҳофаза қилувчи органлар иштирокидаги ушбу ҳалокатли воқеа юзасидан расмийлар билан ҳамкорлик қилаётганини айтган.

Эслатиб ўтамиз, аввалроқ Канаданинг Торонто шаҳрида ўтказилаётган кўча фестивалида содир бўлган отишма оқибатида камида икки киши ҳалок бўлгани, яна бир неча киши ҳалок бўлгани, яна бир неча киши жароҳатлангани ҳақида хабар берилганди.