АҚШда коллеж баскетболчиси отиб ўлдирилди

Теннесси штатининг Нашвилл шаҳридаги Фиск университетининг баскетболчиси Андре Белл отиб ўлдирилди. Бу ҳақда “Fox News” хабар берди.

Манбанинг маълум қилишича, 20 ёшли талаба Андре Белл гимнастика мусобақасида қатнашиб, икки дўсти билан кампусга қайтаётган пайтда автомагистралда номаълум шахслар томонидан ўққа тутилган.

Гувоҳларнинг сўзларига кўра, яқинлашиб келаётган автомобилдан бир нечта ўқ овозлари эшитилган. Беллнинг дўстлари дастлаб вазиятни англамай, ҳайдовчининг яраланганини кечроқ пайқашган. Натижада автомобиль тезлиги пасайиб, магистралда пикап билан тўқнашиб кетган.

Жиддий тан жароҳати олган баскетболчи оғир аҳволда шифохонага етказилган, бироқ шифокорлар унинг ҳаётини сақлаб қола олмаган. Машинада бўлган қолган икки нафар йўловчига шикаст етмаган.Нашвилл полиция бошқармаси ҳодиса юзасидан тергов ишларини олиб бормоқда.

Терговчиларнинг билдиришича, воқеа жойида топилган синган ойна бўлакларига асосланиб, ўқ узилган автомобилнинг олд ойнаси шикастланган бўлиши мумкинлиги тахмин қилинмоқда.

“У жамоамизнинг муҳим устуни эди. Бироқ Андре, энг аввало, ўзининг беғубор табассуми, кўнгилчанлиги ва атрофдагиларнинг қалбига илиқлик улаша олиш фазилати билан хотирамизда қолади”, — дейилади Фиск университети баскетбол жамоаси баёнотида.

Эслатиб ўтамиз, аввалроқ АҚШнинг Оклахома штатидаги Коннорс Стейт коллежининг иккинчи курс талабаси Итан Дитц Техаснинг Денисон шаҳрида Грейсон коллежига қарши бўлиб ўтган баскетбол ўйинида бошидан жароҳат олгандан сўнг уч кун ўтиб вафот этган эди.