АҚШда иккита самолёт тўқнашиб кетди. Қурбон бор (видео)

АҚШнинг Аризона штатидаги аэропортда икки бизнес-жет тўқнашуви оқибатида бир киши ҳалок бўлди. Бу ҳақда манбаларга таяниб, “Arizona's family” хабар берди.

АҚШ авиация бошқармасига кўра, ҳодиса кеча, 10 февраль куни маҳаллий вақт билан тахминан 15:00 да Аризонанинг Скоттсдейл аэропортида юз берган. Саккиз йўловчи учун мўлжалланган Learjet 35A самолёти қўнгандан сўнг учиш-қўниш йўлагидан чиқиб кетиб, Gulfstream 200 (18 ўринли) бизнес-жети билан тўқнашган. Learjet 35A самолёти Техас штатининг Остин шаҳридан учиб келган.

Нашр манбаларига кўра, тўқнашув оқибатида камида бир киши ҳалок бўлган. Уч киши шифохонага ётқизилган. Яна беш киши самолётлардан бирининг ичида қолиб кетган. Қутқарув операцияси олиб борилмоқда. Расмийлар қутқарув ишлари тугагунча аэропортни ёпган.

Эслатиб ўтамиз, аввалроқ Американинг Сиэтл-Такома аэропортида Япониянинг Japan Airlines компаниясига тегишли бўлган йўловчи самолёти АҚШнинг Delta Air Lines авиакомпаниясига қарашли самолёт билан тўқнашганди. Жабрланганлар ҳақида маълумот берилмаган. Йўловчилар эса бошқа самолётга кўчирилган.