АҚШда иккита самолёт тўқнашиб кетди

Кеча, 1 октябрь куни АҚШнинг Нью-Йорк штатидаги ЛаГуардиа аэропортида Роанок шаҳрига жўнаб кетаётган самолёт қаноти Шимолий Каролина штатининг Шарлотт шаҳридан келган самолётнинг фюзеляжи билан тўсатдан тўқнашиб кетди. Бу ҳақда Delta авиакомпаниясига таяниб, “New York Post” нашри хабар берди.

Қайд этилишича, тўқнашув оқибатида камида бир киши (стюардесса) энгил жароҳат олган ва иккала рейс бортидаги йўловчилар ҳам жабрланмаган. Роанок шаҳрига кетаётган самолёт бортида 35 киши, Шарлотт шаҳридан келган самолёт бортида эса 61 киши бўлган. Нью-Йорк ва Ню-Жерси аэропорт маъмуриятининг баёнотига кўра, жароҳат олган шахс шифохонага ётқизилган.Тўқнашув сабаблари ҳозирча номаълум. 

Воқеага қарамай, аэропорт маъмурияти аэропорт фаолиятига ҳеч қандай таъсир кўрсатмаганини қайд этган. 

“Delta барча тегишли органлар билан нима содир бўлганини кўриб чиқиш учун ишлайди, чунки мижозларимиз ва одамлар хавфсизлиги ҳамма нарсадан устун туради. Биз мижозларимиздан вазият учун узр сўраймиз”, дейилади авиакомпания баёнотида. 

Эслатиб ўтамиз, жорий йилнинг 24 сентябрь куни Россия пойтахти Москва шаҳридаги “Шереметево” аэропортида иккита йўловчи самолёти тўқнашиб кетган эди. “Hainan Airlines”га қарашли самолётнинг қаноти “Россия” самолётининг орқа қисмига тегиб кетган ва оқибатда улар зарарланган.

Моҳичеҳра Қадамова