Каннаваро Мексика ёки АҚШ клубига кетиши мумкин – ОАВ

Ўзбекистон миллий терма жамоаси бош мураббийи Фабио Каннаваро Мексика ва АҚШдаги клубларда ишлаш имкониятларини излаш билан шуғулланувчи агентлик билан шартнома имзолади. Бу ҳақда TUDN нашри хабар берди.

“Мексика футболи яна бир бор жаҳон чемпионини кутиб олиши мумкин. У янги жамоа изламоқда ва эътиборини Liga MX мусобақасига қаратган. Бироқ бу сафар майдонга футболчи эмас, балки мураббий чиқади”, дейилади Мексика нашри хабарида.

Маълум қилинишича, Лотин Америкаси бозорида фаолият юритувчи агентлик 2006 йилги жаҳон чемпиони ва “Олтин тўп” соҳиби учун Мексиканинг Liga MX ёки АҚШнинг MLS лигаларидаги клублардан иш топиш имкониятларини ўрганади.

Каннаваро 2025 йил октябрь ойида Ўзбекистон миллий терма жамоаси бош мураббийи этиб тайинланган ва Тимур Кападзе ўрнини эгаллаган эди. Италиялик мутахассис Ўзбекистон миллий терма жамоаси билан 2+3 йиллик схема бўйича шартнома имзолаган. Яъни, Каннаваронинг мажбурий шартномаси 2027 йилнинг октябригача амал қилади.

Маълумот учун, Каннаваро Ўзбекистон терма жамоасигача Италиянинг “Беневенто” ва “Удинезе”, шунингдек, Хорватиянинг “Динамо Загреб” клубларида фаолият юритган.