АҚШда гуманитар ёрдам олиб кетаётган самолёт қулаб тушди

АҚШнинг Флорида штатида Ямайкага гуманитар ёрдам олиб кетаётган кичик самолёт қулаб тушди, оқибатда икки киши ҳалок бўлди. Бу ҳақда “Associeted Press” нашри хабар берди.

Қайд этилишича, кеча, 10 ноябрь куни Форт-Лодердейл шаҳри яқинидаги Coral Springs тураржой ҳудудида жойлашган ҳовузга Ямайкага бўрон оқибатларини юмшатиш учун гуманитар ёрдам олиб кетаётган кичик турбовинтли самолёт қулаган. Ҳалокат оқибатида икки киши вафот этган. Самолёт уйлар орасидан ўтиб, уларга шикаст етказмаган.

Coral Springs полицияси ҳалок бўлганлар борлигини тасдиқлаган, аммо самолёт ичидаги шахслар ҳақида батафсил маълумот бермаган. Фавқулодда хизматлар чақириқ келиб тушган заҳоти воқеа жойига етиб борган. Дастлаб қутқарув ишлари олиб борилган, аммо қурбонлар топилмаганидан кейин операция “жасадларни қидириш” босқичига ўтган.

Ёнғин ва қутқарув хизмати раҳбари ўринбосари Майк Мосернинг айтишича, ҳеч бир уйга зарар етмаган, бироқ ҳовуз атрофида самолёт парчалари топилган. Маҳаллий телеканаллар эса ҳовуз ёнидаги уйлардан бири панжарасининг синганини кўрсатган.

Маҳаллий аҳоли вакили Кеннет ДеТролио “South Florida Sun Sentinel” нашрига берган интервьюсида айтишича, самолёт унинг уйи орқасидан учиб ўтган, панжарани бузиб, пальма дарахтларини қулатган ва ҳовузга қулаган. Уйнинг орқа ҳовлиси ёнилғи билан ифлосланган, уй ичида ҳам ёнилғи ҳиди бир неча соат давомида кетмаган. 

“Ғалати бир товуш эшитилди, бундай товушни илгари ҳеч эшитмаганмиз. Кейин билдикки, самолёт бизнинг уйдан ва қўшнимизнинг уйидан ўтган экан”, дейди ДеТролио.

Нашрга кўра, 1976 йилда ишлаб чиқарилган “Beechcraft King Air” русумли самолёт Форт-Лодердейл Ижроия аэропортидан маҳаллий вақт билан соат 10:14 да учган. Атиги 5 дақиқа ўтиб, яъни 10:19 да Coral Springs ҳудудида қулаган. Бу русумдаги самолётлар одатда 7–12 кишигача йўловчи таший олади.

Маълумот учун, 2025 йилнинг 28 октябрь куни Ямайкада “Melissa” бўрони қуруқликка чиққан — бу Атлантика океани тарихидаги энг кучли бўронлардан бири сифатида қайд этилган. Бўрон Ямайкада 120 мингдан ортиқ бино томини учириб кетган, 90 мингга яқин оила зарар кўрган. Бўрондан бир ҳафта ўтиб ҳам 2000 дан ортиқ одам вақтинчалик бошпаналарда яшаб тургани маълум қилинган.

Эслатиб ўтамиз, аввалроқ АҚШнинг Кентукки штатидан UPS компаниясига тегишли MD-11 юк самолёти қулаб тушган ва оқибатда 7 киши вафот этганди.