АҚШда фентанил расман оммавий қирғин қуроли деб тан олинди

Кеча, 15 декабрь куни АҚШ Президенти Дональд Трамп фентанилни расман оммавий қирғин қуроли сифатида таснифловчи фармонга имзо чекишини эълон қилди. Унинг чиқиши Оқ уй томонидан жонли эфирда намойиш этилди.

“Бугун имзолайдиган ушбу тарихий фармон билан биз фентанилни расман оммавий қирғин қуроли сифатида таснифлаймиз. У аслида шундай қуролдир. Ҳеч бир бомба бундай даражада вайронкор таъсир кўрсата олмайди”, дейди Трамп.

Америка етакчисининг сўзларига кўра, фентанил истеъмоли ҳар йили 200-300 минг кишининг ўлимига сабаб бўлмоқда.

Қайд этиш жоиз, бунгача Трамп Хитой Халқ Республикаси раиси Си Цзиньпин билан бўлиб ўтган суҳбатида турли масалалар, жумладан, фентанил тарқалиши муаммоси ҳам муҳокама қилинганини айтган эди.

Шунингдек, жорий йилнинг 15 ноябрь куни АҚШ Адлия вазирлигининг Венесуэладан гиёҳванд моддалар ташиётган кемаларга зарба беришга рухсат берувчи махфий ҳужжатида фентанил кимёвий қурол сифатида қўлланиши мумкин бўлган таҳдид сифатида тавсифланган.

Бироқ Адлия вазирлиги вакили “The Wall Street Journal” нашрига берган изоҳида ҳарбий ҳаракатларни оқлаш бўйича юридик далиллар наркотик савдоси билан шуғулланувчилар томонидан кимёвий қуролдан фойдаланилиши ҳақидаги хавотирларга асосланмаганини айтган.

Маълумот учун, фентанил – наркотик опиоид анальгетик, μ-опиоид рецепторларининг кучли агонисти. Цитрат шаклида ишлаб чиқарилади. Асосан анестезиология, парамедицина, дала тиббиёти ва фавқулодда ҳолатлар тиббиётида оғриқ қолдирувчи сифатида, шунингдек кеч босқичдаги саратонда ҳамда нурланишга учраганларда клиник фойдаси сезиладиган босқичдаги даврида қўлланади. Юқори токсиклиги сабабли эвтаназия учун ҳам қўлланиши мумкин. Бироқ у жуда кучли ва тез қарамлик келтириб чиқаради, ўта кичик доза ҳам ўлимга олиб келиши ва нафас йўлларини бўғиб қўйиши эҳтимоли бор.

Эслатиб ўтамиз, аввалроқ Дональд Трамп Лотин Америкасидан Қўшма Штатлар томон ҳаракатланган, ичида гиёҳванд моддалар бор деб тахмин қилинган “улкан сувости кемаси” йўқ қилинганини эълон қилганди.