АҚШ яқин орада баллистик ракета синовини ўтказмоқчи – ОАВ

АҚШ шу ҳафтада ядровий қурол ташишга қодир, аммо жанговар каллаксиз қитъалараро баллистик ракета синовини ўтказишни режалаштирган. Бу ҳақда “Newsweek” хабар берди.

Нидерландиядаги Делфт Техника университетининг аэрокосмик муҳандислик факультети ўқитувчиси Марко Лангбрукнинг маълум қилишича, навигацион огоҳлантиришларга кўра, Minuteman III туридаги АҚШ қитъалараро баллистик ракетасининг синов парвози жорий йилнинг 5-6 ноябрь кунлари бўлиб ўтиши кутилмоқда.

Ракета Калифорниядаги Ванденберг ҳарбий-космик базасидан учирилади ва Тинч океанининг марказий қисмида жойлашган Маршалл оролларидаги ракетага қарши мудофаа полигонига, шунингдек бешта белгиланган чиқинди ҳудудига етиб боради.

Агар бу маълумот тасдиқланса, парвоз йўналиши май ойида ўтказилган аввалги синовдаги каби бўлади. Ўша сафар жанговар каллаксиз ракета ягона қайтувчи капсулани ташиган ҳолда Калифорниядан ғарбга томон тахминан 4200 миль масофани босиб ўтган.

Қайд этилишича, бу жорий йилнинг сентябрь ойидан буён АҚШ ядро кучларининг иккинчи синови бўлади. Ўшанда АҚШнинг сувости кемаси Атлантика океанида, Флорида соҳиллари яқинида тўртта қуролсиз Trident II D5 Life Extension ракетасини учирган.

Нашрнинг ёзишича, АҚШ Ҳаво кучларининг глобал зарбалар қўмондонлиги (ISBM ва ядровий бомбардимончилар учун масъул) изоҳ беришдан ҳозирча тийилган.

Эслатиб ўтамиз, аввалроқ АҚШ Президенти Дональд Трамп унинг мамлакати дунёда энг катта ядро арсеналига эгалиги, бу захира бутун дунёни 150 марта портлатишга етишини айтган эди.