АҚШ Венесуэла Президентини ўғирламоқчи бўлди

Америка Қўшма Штатлари Венесуэла Президенти Николас Мадуро самолётининг бир учувчисини ёллашга ҳаракат қилган. Бу ҳақда “Associated Press” хабар берди.

Агентлик маълумотларига кўра, АҚШ учувчига Венесуэла Президенти самолётини Пуэрто-Рико, Доминикан Республикаси ёки Гуантанамо (АҚШ базаси)га қўндиришни таклиф қилган.

Манбаларга кўра, 2024 йилнинг апрель ойида АҚШ ҳукумати Доминикан Республикасидаги информатор орқали олинган маълумотлар асосида Мадуро учувчиларидан бирига алоқага чиққан. Унга самолётни АҚШ кучлари ҳибсга ола оладиган жойлардан бирига, хусусан Пуэрто-Рико, Доминикан Республикаси ёки Куба оролидаги Гуантанамо ҳарбий базасига қўндириш таклиф қилинган.

Нашрнинг ёзишича, бунинг эвазига АҚШ вакиллари учувчига “жуда бой бўлиши ва миллионлаб ватандошларининг севгисини қозониши”ни ваъда қилган.

Хабарга кўра, учувчи АҚШ агенти билан бир неча бор мессенжер орқали ёзишган, бироқ сўнгги марта 2024 йилнинг сентябрь ойида уни ҳамкорликка кўндиришга уринишдан сўнг, у рақамни блоклаган.

Колумбия университетининг Барқарор ривожланиш маркази директори Жеффри Сакснинг таъкидлашича, АҚШнинг Венесуэлага нисбатан олиб бораётган кескин сиёсати наркокартелларга қарши кураш билан боғлиқ эмас, аслида Вашингтон Венесуэла нефтидан фойдаланиш имконига эга бўлишни хоҳлайди.

Мадуро бир неча бор АҚШ томонидан мамлакатга сўнгги 100 йилдаги энг катта босқин таҳдиди мавжудлигини билдирган. Вашингтон эса Каракасни наркотик контрабандачилигига қарши курашда сустликда айблаб келади.

АҚШ денгиз флоти ҳозирда Кариб денгизида 8 та кема, 1 та атом сувости кемаси ва 10 минг аскар жойлаштирган. Улар халқаро сув ҳудудида камида 9 та тез юрувчи қайиқларни йўқ қилган, уларнинг бортидаги шахслар Венесуэладан наркотик ташишда айбланган.

Эслатиб ўтамиз, аввалроқ АҚШ Венесуэла Президенти Николас Мадурони ҳибсга олишга ёрдам берадиган маълумот учун 50 млн доллар мукофот ваъда қилганди.