АҚШ Украинага Tomahawk ракеталарини юбориши мумкин – Вэнс

Россия ва Украина ўртасидаги тўғридан тўғри музокаралар масаласи савол остида қолаётган бир пайтда Вашингтон Киевни Tomahawk ракеталари билан таъминлаш масаласини кўриб чиқмоқда. Бу ҳақда кеча, 28 сентябрь куни АҚШ вице-президенти Жеймс Дэвид Вэнс “Fox News” телеканалига берган интервьюсида айтиб ўтди.

“Москва АҚШ Президенти Дональд Трамп воситачилигидаги икки ва уч томонлама тинчлик музокараларини рад этишда давом этар экан, Қўшма Штатлар Киевга Tomahawk ракеталарини етказиб беришни кўриб чиқмоқда. Сиз Tomahawk ҳақида сўрадингиз. Бу борада Президент Америка Қўшма Штатлари манфаатларига мос келадиган якуний қарорни қабул қилади. Мен ҳозир ушбу масалада музокаралар олиб бораётганимизни биламан”, дейди вице-президент.

Ушбу қарорлар Оқ уйда Россиянинг Украина билан давом этаётган кенг кўламли урушини тугатишга қаратилган тўғридан тўғри музокаралар бўйича позициясига нисбатан сабрсизлик кучайиб бораётган бир пайтда қабул қилиниши мумкин. Шунингдек, Вэнс Кремль Украина етакчиси билан нафақат яккама-якка, балки Трамп иштирокида ҳам музокаралар олиб боришга тайёр эмаслигини тан олган.

“Охирги бир неча ҳафта ичида биз россияликлар украиналиклар билан икки томонлама учрашув ўтказишдан бош тортаётганини кўрдик. Улар Президент ёки маъмуриятнинг бошқа аъзоси россияликлар ва украиналиклар билан учрашиши мумкин бўлган ҳар қандай уч томонлама учрашувларни рад этди”, дейди Вэнс.

АҚШ вице-президентининг сўзларига кўра, россияликлар урушдан кам фойда кўради. 

“Бу уруш уларнинг иқтисодиёти учун даҳшатли ва улар ўзларига жуда кичик ҳарбий устунлик учун яна қанча одамни йўқотишлари ва яна қанча одамни ўлдириши кераклиги ҳақида сўраши лозим”, дейди Вэнс.

Қайд этиш жоиз, Украина Президенти Владимир Зеленский ўтган ҳафта Нью-Йоркда БМТ Бош Ассамблеяси доирасидаги йиғилишда Трампдан Киевга узоқ масофага учувчи Tomahawk қанотли ракеталарини етказиб беришни сўраган.

Эслатиб ўтамиз, аввалроқ АҚШ Президенти Дональд Трампнинг махсус вакили Кит Келлогг “Fox News” телеканалига берган интервьюсида Оқ уй раҳбари Украинага Россия ҳудудига узоқ масофали қуролли зарбалар бериш учун рухсат берганини айтганди. Келлоггдан Украина кучларининг Россияга бундай зарбалар бериш мумкинлиги ҳақида Президентнинг позицияси қандай экани бўйича савол берилган. Махсус вакилнинг айтишича, Трамп бунга қаршилик қилмайди. Шунингдек, вице-президент Жеймс Дэвид Вэнс ва Давлат котиби Марко Рубионинг баёнотлари ҳам Россияга чуқур зарба бериш имкониятидан фойдаланишни назарда тутади.

Моҳичеҳра Қадамова