АҚШ Суриядаги ҳарбий базаларини ёпмоқчи

АҚШ Суриядаги саккизта ҳарбий базасидан фақат биттасини сақлаб қолади. Бу ҳақда АҚШнинг Туркиядаги элчиси ва Сурия бўйича махсус вакили Томас Барак америкалик ОАВларга берган интервьюсида сўз очди.

“Биз саккиз базадан фақат биттасини қолдирамиз”, деган Барак.

Дипломатга кўра, Вашингтон Сурияга нисбатан ўн йиллаб давом этган сиёсатини ўзгартиришга қарор қилган, чунки бу сиёсат самара бермаган.

Барак шунингдек, курдлардан ташкил топган Сурия демократик кучлари АҚШ учун ҳануз муҳим иттифоқчи бўлиб қолаётганини айтган ва минтақадаги бошқа ҳамкорлар янги хавфсизлик тизимини шакллантиришда иштирок этишига умид билдирган.

“Fox News” маълумотларига кўра, АҚШ аллақачон Сурияда жойлашган 2000 нафар ҳарбийсидан 500 нафарини олиб чиққан.

Ўтган ҳафтада АҚШ Давлат департаменти вакили Майк Митчелл АҚШ ҳозирча Суриядан бутунлай чиқиб кетишни режалаштирмаётгани ҳақида гапирганди. Унинг сўзларига кўра, АҚШ Дамашқ билан муносабатларда янги босқични бошлашни истамоқда. Дипломат Томас Баракнинг Дамашққа етиб келишини у “тарихий кун” деб атаган.

“The New York Times” апрель ойи ўрталарида АҚШ ўз ҳарбий контингентини қисқартиришни бошлагани ҳақида ёзганди. Нашрнинг икки манбасига кўра, шимоли-шарқий Суриядаги саккизта оператив базанинг учтаси ёпилмоқда ва ҳарбийлар сони 2000 нафардан 1400 нафаргача қисқартирилган.

Эслатиб ўтамиз, аввалроқ Америка Қўшма Штатлари Сурияга қарши 2019 йилда жорий этилган санкцияларнинг бир қисмини 180 кунга тўхтатганди. АҚШнинг ушбу қарори мамлакатлар ўртасидаги кескинликни камайтиргандек кўринди. Қолаверса, 13 май куни АҚШ Президенти Дональд Трамп Сурияга қўйилган санкцияларни олиб ташлаш ва “унга иккинчи имконият бериш”га ваъда берди. Унинг айтишича, бу чекловлар “қатъий ва фалокат даражасида” бўлган, аммо ўз вазифасини бажарган.

Кейинроқ эса Дональд Трамп Саудия Арабистонига ташрифи давомида Сурия муваққат президенти Аҳмад аш-Шара билан шахсан учрашди. Учрашувда Трамп яна бир бор АҚШнинг Сурия бўйича санкцияларни бекор қилишини эълон қилган. Бу қарор Саудия валиаҳд шаҳзодаси Муҳаммад бин Салмондан келган илтимосга биноан амалга оширилган.