АҚШ “соя флоти”га қарши санкцияларни юмшатмоқчи

АҚШ ҳукумати “соя флоти” таркибидаги санкцияга учраган кемаларда нефть ташишга рухсат бериш масаласини кўриб чиқмоқда. Бу ҳақда манбаларга таяниб, “Reuters” хабар берди.

Манбаларнинг билдиришича, янги таклиф санкция остидаги кемаларда чекловларга кирмайдиган нефтни ташишга рухсат беришни назарда тутади. Бундай кемалардан фойдаланмоқчи бўлган компаниялар АҚШ Молия вазирлигидан махсус рухсат олиши керак бўлади.

Маълумот учун, “соя флоти” – халқаро санкцияларни четлаб ўтиб, асосан Россия, Эрон ва Венесуэла каби давлатлардан нефть ҳамда нефть маҳсулотларини ташишда фойдаланиладиган, эгалиги ва суғуртаси кўпинча ноаниқ бўлган кемалар, асосан, эски танкерлардан иборат флот. Бундай кемалар санкциялардан қочиш учун турли давлатлар байроқлари остида сузиши ёки юк ташиш фаолиятини яширишга уриниши мумкин.

Эслатиб ўтамиз, АҚШ Президенти Дональд Трамп жорий йилнинг 18 сентябрь куни Россияга қарши янги санкцияларни назарда тутувчи қонунни имзолаган эди. Ҳужжат банклар, мансабдор шахслар ва “соя флоти”га нисбатан чекловлар жорий этиш, шунингдек, Россия нефти ва газини энг кўп харид қиладиган мамлакатларга божлар қўллашни назарда тутади. Асосий чоралар қонун кучга кирганидан кейин 30 кун ичида жорий этилиши белгиланган. Бироқ Трамп айрим истисноларга рухсат бериш ваколатини ўзида сақлаб қолган.

Аввалроқ, Россия АҚШга йирик миқдорда дизель сотишини маълум қилган эди. Трампнинг Путин билан келишуви ҳам айнан дизель ёқилғиси етказиб бериш ва унга қўйилган чекловларни юмшатиш билан боғлиқ. Шунингдек, Зеленский ушбу келишувни кескин қоралаб, “очиқ заифлик белгиси” деб атаган эди. Зеленскийнинг ушбу фикрларидан сўнг Дональд Трамп Владимир Зеленский ўрнига янги раҳбар сайлаш вақти келганини айтган.

Кейинчалик ОАВ Украинанинг янги президенти лавозимига тўртта номзод номини келтирди.

Зеленскийнинг ўзи эса, агар Россия 60 кунлик тўлиқ ўт очишни тўхтатишга рози бўлса, президентлик сайловларини ўтказишга тайёрлигини билдирган. Бунга жавобан Кремль Зеленскийнинг Украинада сайловлар ўтказиш учун икки ойлик сулҳ тузиш ҳақидаги таклифини рад этган.