АҚШ Сенати Россия ва Эронга қарши санкцияларни маъқуллади

АҚШ Сенати Россия ва Эронга қарши кенг қамровли санкцияларни назарда тутувчи “Lindsey O. Graham Sanctioning Russia and Iran Act of 2026” қонун лойиҳасини 86 овоз билан 11 та овозга қарши қабул қилди. Бу ҳақда “Reuters” хабар берди.

Ҳужжат Россия расмийларига қарши санкциялар жорий этиш, шунингдек, Россия нефти ва газига қарамликни камайтириш мақсадида Хитой, Ҳиндистон ва бошқа давлатларга нисбатан юқори бож тарифларини қўллаш ваколатини президентга беришни назарда тутади.

Қонун лойиҳаси марҳум сенатор Линдси Грэм томонидан илгари сурилган. У Россиянинг Украинага қарши урушида Киевнинг Конгрессдаги энг фаол тарафдорларидан бири бўлган. Ҳужжатда АҚШ Президенти Дональд Трамп талаб қилган Эронга қарши санкцияларни кенгайтириш ҳам кўзда тутилган.

Агар қонун лойиҳаси Вакиллар палатасида ҳам маъқулланиб, Трамп томонидан имзоланса, Президент Россия энергетика ресурсларини йирик миқёсда сотиб оладиган давлатларга, жумладан, Ҳиндистон, Япония ва Европа Иттифоқининг айрим давлатларига импорт тарифларини 100 фоизгача ошириши мумкин.

Қайд этилишича, айрим конгрессменлар ва саноат вакиллари янги тариф ваколатлари АҚШ импортчилари ва истеъмолчилари учун харажатларни ошириши мумкинлигидан хавотир билдирмоқда.

Қонун лойиҳаси энди АҚШ Вакиллар палатасида кўриб чиқилади. Палата 31 август куни ёзги танаффусдан қайтиши кутилмоқда.

Эслатиб ўтамиз, Республикачи сенатор, ташқи сиёсатда қатъий позицияси билан танилган Линдси Грэм Россияга қарши янги санкциялар тўғрисидаги қонун лойиҳаси устида ишлаётган пайтда ўтган ой бошида Киевга ташриф буюриб, Зеленский билан учрашган. У Вашингтонга қайтганидан кўп ўтмай, 71 ёшида юрак хасталиги туфайли вафот этганди.