АҚШ Хитойдан Трамп ва Цзиньпин учрашувини кечиктиришни сўради

АҚШ Президенти Дональд Трамп Хитойдан ХХР Раиси Си Цзиньпин билан учрашувини бир ойга қолдиришни сўради. Трампнинг Хитойга ташрифи 31 март – 2 апрель кунларига режалаштирилган эди. Бу ҳақда “Reuters” хабар берди.

“Биз уни тахминан бир ойга кечиктиришни сўрадик”, дейди Трамп журналистларга.

Оқ уй матбуот котиби Кэролайн Левиттнинг сўзларига кўра, Трамп Эрондаги ҳарбий операцияни назорат қилиш зарурати туфайли учрашувни кўчиришни сўраган. 

“Президент Хитойга ташрифни интизорлик билан кутмоқда. Саналар ўзгариши мумкин. Олий бош қўмондон сифатида ҳозирда унинг биринчи галдаги вазифаси – ушбу операциянинг кейинги муваффақиятини таъминлашдир”, дейди у.

Кеча, 16 март куни АҚШ Президенти Пекинни Ҳормуз бўғози масаласида Вашингтонга ёрдам беришга чақирди, чунки ХХР ўз нефтининг 90 фоизини айнан шу денгиз коридори орқали амалга ошириладиган етказиб беришлардан олади. Трамп Пекинга ташрифи режалаштирилган санагача Хитойнинг ушбу чақириққа жавобини олишни истаётганини билдирди ва учрашув кўчирилиши мумкинлигини таъкидлади.

Эслатиб ўтамиз, аввалроқ Трамп жаҳон етакчиларини Ҳормуз бўғозини қўриқлашда иштирок этишга чақирганди. Шунингдек, Америка етакчиси Хитой, Буюк Британия, Франция, Япония ва Жанубий Кореяга мурожаат қилиб, ушбу стратегик сув йўлида биргаликда патруллик қилиш учун ҳарбий кемаларини юборишга ундаган эди.