АҚШ халқаро сувларда яна бир кемани йўқ қилди

АҚШ Мудофаа вазири Пит Ҳегсетт Америка қўшинлари Тинч океанининг халқаро сувларида гиёҳванд моддалар ташиш учун фойдаланилган деб тахмин қилинган катерни йўқ қилганини маълум қилди. Бу ҳақда у кеча, 22 октябрь куни Х ижтимоий тармоғидаги саҳифасида ёзди.

Қайд этилишича, кеча, 22 октябрь куни АҚШ ҳарбийлари Президент Дональд Трампнинг кўрсатмасига биноан, Тинч океанининг шарқий қисмида кичик денгиз кемасига зарба берган. Ҳегсеттнинг сўзларига кўра, унда АҚШ томонидан террорчи деб топилган ташкилот аъзолари томонидан гиёҳванд моддалар ташилаётган бўлган.

Пентагон раҳбарининг таъкидлашича, “халқаро сувларда амалга оширилган зарба вақтида кема бортида наркотерроризм билан боғлиқ уч киши бўлган”, улар ҳалок бўлган. Вазирнинг билдиришича, америка ҳарбийлари орасидан қурбонлар йўқ. 

“Бундай зарбалар давом эттирилади”, деди у.

Бундан олдин CBS телеканали маълум қилишича, АҚШ Қуролли кучлари Тинч океанида яна бир катерга зарба берган – у ҳам гўёки гиёҳванд моддаларни АҚШга етказишда қўлланилган. Манбага кўра, бу АҚШ ҳарбийлари томонидан наркотрафикка қарши кураш баҳонасида йўқ қилинган саккизинчи кема бўлиб, аввалги зарбалар Кариб денгизининг жанубий қисмида амалга оширилган эди.

Кариб денгизидаги ҳужумлар

17 октябрь куни АҚШ ҳарбийлари Кариб денгизида сувостида ҳаракатланаётган, эҳтимол, ярим сувга ботувчи кемага зарба берган. Қутқарув операцияси давомида икки киши АҚШ ҳарбий-денгиз кучлари кемасига олиб чиқилган, яна икки нафар экипаж аъзоси ҳалок бўлган.

АҚШ Давлат котиби Марко Рубио омон қолганлар ҳақида саволга: “Бу террорчилар”, дея жавоб берган.

АҚШ ҳужумидан омон қолган икки киши, яъни Эквадор ва Колумбия фуқароларини ватанига қайтариш режалаштирилган. Уларга нисбатан ҳибсга олиш ва суд жараёни қўлланади.

Венесуэлага қарши жанглар 

Трамп, аввалроқ, Венесуэла Президенти Николас Мадуро “жиноятчи гуруҳ”ни бошқараётгани, улар АҚШ ва бошқа Ғарб давлатларида оммавий қотилликлар, наркотрафик, жинсий савдо ва террор ҳаракатлари билан шуғулланаётганини айтган эди. Унга кўра, Пентагон бу ҳудудда наркокартелларга қарши ҳарбий операциялар бошлашга тайёр.

Сентябрь ойидан буён АҚШ армияси наркотрафикка алоқадор деб ҳисобланган камида олти кемага зарба берган. CNBC маълумотларига кўра, бу операциялар оқибатида камида 29 киши ҳалок бўлган.

Ҳозирда Венесуэла қирғоқлари яқинида АҚШ ҳарбий-денгиз кучларига тегишли бир нечта кемалар, 10 та F-35 жанговар самолёти, 2200 аскардан иборат денгиз пиёдалари экспедицион бўлинмаси ва сувости кемаси жойлаштирилган.

Венесуэланинг БМТдаги элчиси Самуэль Монкада АҚШ ҳужумларини ноқонуний, суверенитетга тажовуз сифатида баҳолаб, БМТ Хавфсизлик Кенгашидан бу масалага муносабат билдиришни сўраган. 

Эслатиб ўтамиз, олдинроқ АҚШ Президенти Дональд Трамп Лотин Америкасидан Қўшма Штатлар томон ҳаракатланган, ичида гиёҳванд моддалар бор деб тахмин қилинган “улкан сувости кемаси” йўқ қилинганини эълон қилганди.