АҚШ қўшинларининг учдан бир қисмини Европадан олиб чиқиб кетиши мумкин

Вашингтон Европада жойлашган АҚШ ҳарбийларининг 30 фоизини қайта жойлаштиришга қарор қилиши мумкин. Бу ҳақда НАТОдаги манбага таяниб, “Politico” хабар берди.

Газета манбаси Америка контингентини Европада сезиларли даражада қайта гуруҳлаш эҳтимоли ҳақида хабар берди. АҚШнинг кўхна қитъадаги қўшинлари сони бўйича якуний қарор глобал кучлар мувозанатини кўриб чиқиш натижаларига кўра қабул қилинади. Пентагон якуний ҳисоботни сентябрь ойида эълон қилиши кутилмоқда.

Нашрда таъкидланганидек, Европадаги АҚШ қўшинларининг ҳозирги сони 90 мингдан 100 минг кишигача. АҚШнинг Европадаги ҳарбий контингентининг режалаштирилган қисқариши Ҳинд-Тинч океани минтақасида кескинликнинг кучайиши, шунингдек, Вашингтоннинг унинг хориждаги мавжудлиги учун харажатларини камайтириш нияти билан боғлиқ бўлиши мумкин. 

Маълумот учун, АҚШ бутун дунёни қамраб олган 1000 та ҳарбий базадан иборат тармоққа эга. 80 дан ортиқ мамлакатларда камида 170 000 АҚШ аскари бор. АҚШнинг энг кўп сонли қўшинлари Япония, Германия ва Жанубий Кореяда жойлашган.