АҚШ фирмаси “Атлетико Мадрид”нинг асосий улушини сотиб олди

АҚШнинг хусусий сармоя компанияси Apollo Sports Capital “Атлетико Мадрид”нинг асосий улушини сотиб олди. Бу ҳақда EFE нашри хабар берди.

Манбага кўра, Apollo “Атлетико”нинг 51–55% акцияларини сотиб олади. Битим 2026 йилнинг биринчи чорагида якунланиши кутилмоқда.

Келишувга кўра, клуб бош директори Мигель Анхель Гил ва президент Энрике Сересо ўз вазифаларида қолади. 

“Биз клубга содиқ янги ҳамкорни қабул қилишдан фахрланамиз. Apollo Sports Capital “Атлетико Мадрид” тарихи ва анъаналарини ҳурмат қилади ва бизнинг рақобатбардошлигимизни сақлаб қолишга ёрдам беради”, дейди клуб бош директори Гил.

Apollo'нинг спортга инвестицияси  жорий йилнинг сентябрь ойида ишга туширилган бўлиб, компанияда сармоя учун 5 миллиард доллар миқдоридаги маблағлар мавжуд. Фирма аллақачон спорт соҳасида фаол бўлиб, шу йил Премьер-лиганинг “Ноттингем Форест” клубига 80 миллион фунт стерлинг кредит ажратган.

Бу битим АҚШнинг хусусий сармоя фирмаси томонидан Европа спортига киритилган энг йирик сармоялардан бири ҳисобланади. Шу билан Apollo Испания футболига сармоя киритган энг сўнгги хусусий фирмага айланди.

Маълумот учун, “Атлетико Мадрид” айни дамда Ла Лига турнир жадвалида 25 очко билан 4-ўринда бормоқда.