АҚШ Эронга янги санкциялар жорий қилди

Кеча, 15 январь куни АҚШ Молия вазирлиги Эронга нисбатан санкциялар рўйхатини кенгайтириб, унга 11 нафар шахс ва 13 та ташкилотни қўшди. Бу ҳақда вазирлик сайтида маълум қилинди.

Янгиланган санкциялар рўйхатига Бирлашган Араб Амирликлари, Эрон, Сингапур ва Буюк Британияда рўйхатдан ўтган ташкилотлар, жумладан газ ва нефть компаниялари киритилган. Шунингдек, рўйхатда Эрондаги Фардис қамоқхонаси ҳам қайд этилган.

Вазирлик томонидан рўйхатга киритилганлар намойишларни бостиришга ҳамда нефть савдосидан тушган даромадларни чет эл бозорларида ювишга кўмаклашгани  иддао қилинмоқда.

“Молия вазирлиги президент Трамп топшириғига биноан, Эрон режими вакилларига қарши санкциялар киритмоқда. Трамп Эрон халқини қўллаб-қувватлайди”, деган АҚШ Молия вазири Скотт Бессант ўз видеомурожаатида.

Унинг сўзларига кўра, Эрон раҳбарияти тинч намойишларга шафқатсиз зўравонлик билан жавоб берган: кўчаларда оммавий отишмалар, жароҳатланганлар ва шифохоналарга ҳужумлар шулар жумласидан.

Бессантнинг таъкидлашича, вазирлик томонидан жорий этилган санкциялар 11 нафар шахс ва ташкилотга қаратилган. Санкциялар рўйхатига Эрон миллий хавфсизлик кенгаши раҳбари Али Ларижоний ҳам киритилган.

Шунингдек, Ислом инқилоби муҳофизлари корпуси ва Эрон полициясининг минтақавий қўмондонлари ҳам санкциялар остига тушган.

Вазирликнинг огоҳлантиришича, ушбу рўйхатдаги ташкилотлар билан ҳамкорлик қиладиган банклар ёки бошқа тузилмалар ҳам иккиламчи АҚШ санкцияларига дуч келиши мумкин.

Эслатиб ўтамиз, аввалроқ “The New York Times” нашри америкалик расмийларга таяниб, Исроил Бош вазири Биньямин Нетаньяху АҚШ Президенти Дональд Трампдан Эронга қарши ҳарбий зарбаларни вақтинча кечиктиришни сўрагани ҳақида ёзганди.