АҚШ Эрон нефтидан санкцияларни олиб ташлаши мумкин

АҚШ таклифни кўпайтириш ва нархларни тушириш мақсадида яқин кунларда танкерлардаги Эрон нефтининг бир қисмидан санкцияларни олиб ташлаши мумкин. Бу ҳақда бугун, 19 март куни АҚШ Молия вазири Скотт Бессент баёнот берди.

“Яқин кунларда биз аллақачон денгизда бўлган Эрон нефтидан санкцияларни ечишимиз мумкин. Гап тахминан 140 миллион баррель ҳақида бормоқда”, дейди у.

Унинг сўзларига кўра, ушбу ҳажм жаҳон бўйича икки ҳафталик таклифга тенг ва нархларнинг кўтарилишини вақтинча тўхтатиб туришга қодир. Сўнгги ҳафталарда АҚШ ва Исроил ҳужумларидан кейин Эрон томонидан Ҳормуз бўғози ёпиб қўйилиши фонида нефть нархи бир баррель учун 100 доллардан юқори кўрсаткичда сотилмоқда.

Бессент АҚШ Эроннинг энергетика инфратузилмасига зарба бермаётганини ва Форс кўрфазидан жорий нефть экспортига тўсқинлик қилмаётганини таъкидлаган.

“Биз жисмоний таклифни оширмоқдамиз”, дея қайд этган у.

Бессентнинг баҳолашича, Ҳормуз бўғозининг ёпилиши суткасига 10–14 миллион баррель миқдоридаги таклиф тақчиллигига олиб келган ва Вашингтон буни етказиб бериш ҳажмини ошириш ҳисобига қоплашга ҳаракат қилмоқда.

Эслатиб ўтамиз, аввалроқ Вашингтон Россия нефтига нисбатан ҳам шундай чорани қўллаган ва танкерлардаги хомашёни сотишга рухсат берган эди. Бу жаҳон бозорига тахминан 130 миллион баррель қўшилишини таъминлади. Вазирнинг қўшимча қилишича, АҚШ таклифни ошириш учун бошқа қадамларни ҳам кўриб чиқмоқда. Улар орасида стратегик захиралардан қўшимча нефть чиқариш ҳам бор. Бундан олдин G7 давлатлари бозорга 400 миллион баррель нефть чиқаришга келишиб олган эди.