АҚШ энди Украина учун пул сарфламайди – Трамп

АҚШ Президенти Дональд Трамп энди Россия-Украина можаросини ҳал қилиш учун пул сарфламаслигини айтди. Бу ҳақда у кеча, 25 август куни Оқ уйдаги брифингда сўз очди.

“Биз Украинага ҳеч қандай пул тўламаяпмиз... Энди биз ҳеч қандай пул йўқотмаяпмиз. Энди биз НАТОга қурол сотяпмиз, чунки НАТО менинг шарофатим билан, (мудофаа) харажатларини 5 фоизга оширишга рози бўлди”, деди Трамп.

19 август куни АҚШ Давлат котиби Марко Рубио ҳам Трамп маъмуриятининг худди шундай стратегияси ҳақида маълум қилди. Унинг сўзларига кўра, Вашингтон “энди Украинага қурол бермаяпти, пул ҳам бермаяпти”.

АҚШ Президенти, Украина Президенти Владимир Зеленский ва Европа етакчилари ўртасидаги 19 август куни бўлиб ўтган музокаралардан сўнг “Financial Times” газетаси Украина Европа иттифоқчилари ҳисобига “хавфсизлик кафолати олиш бўйича келишув доирасида” Америка қуролларини 100 миллиард долларга сотиб олишга ваъда бергани ҳақида хабар берди.

Бундан ташқари, Киев ва Вашингтон Украина компаниялари билан биргаликда дрон ишлаб чиқариш бўйича 50 миллиард долларга алоҳида битим тузади.