АҚШ дефолт хавфи остида қолиши мумкин

АҚШ Президенти Жо Байден Конгресснинг вакиллар палатаси спикери Кевин МакКартини давлат қарзи бўйича дефолтнинг олдини олишга чақирди. Бу ҳақда “Америка Овози” хабар берди.

"Америка қарздор давлат эмас. Биз ҳеч қачон ва ҳеч қачон қарзни тўламаган эмасмиз", деди Байден душанба куни Оқ уйда сўзлаган нутқида.

У давлат қарзини тўламаслик кредит карта ва ипотека ставкаларининг ҳаддан ташқари ўсишига олиб келиши ҳақида огоҳлантирган.

"Биз қила оладиган энг долзарб нарса – иқтисодиётимиз ва молиявий тизимимизнинг узоқ муддатли барқарорлигини таъминлаш. Бу борада қилишимиз керак бўлган энг муҳим нарса – Вакиллар палатаси спикери давлат қарзини тўлашда дефолт билан таҳдид қилишни бас қилишидир", деган АҚШ Президенти.

Ўтган ҳафта Конгресснинг Вакиллар палатасида республикачилар жорий 31,4 триллион долларлик давлат қарзи чегарасини қўшимча 1,5 триллион долларга оширадиган қонун лойиҳасини қабул қилди. Қонун лойиҳаси, шунингдек, келгуси ўн йил ичида катта харажатларни қисқартиришни ўз ичига олади. Бироқ демократлар назоратидаги Сенат ва Жо Байден миллий қарз лимитини оширишни маъқулламасликларини айтмоқда.

Манбага кўра, Конгресс миллий қарз лимитини оширишни маъқулламаса, АҚШ Молия вазирлиги бир неча ҳафта ичида тўловларни тўлаши учун маблағ етишмай қолиши мумкин. АҚШ Молия вазири Жанет Елленнинг сўзларига кўра, агар Конгресс чора кўрмаса, унинг департаменти ҳукуматнинг тўлов мажбуриятларини “июнь ойи бошида ва эҳтимол, 1 июнгача” бажара олмайди.

Бундай ҳолда, Вашингтон АҚШнинг 250 йиллик фаолияти давомида биринчи марта дефолт хавфи остида қолади.