АҚШ Давлат котибини олиб кетаётган самолёт носозлик сабаб ортга қайтди

Мюнхенга АҚШ Давлат котиби Марко Рубио ва Сенатнинг Ташқи алоқалар қўмитаси раиси Жим Ришни олиб бориши керак бўлган АҚШ Ҳарбий-ҳаво кучларининг самолёти техник носозлик туфайли кеча, 13 февраль куни кечқурун Вашингтонга қайтди. Бу ҳақда Давлат департаменти матбуот котиби Тэмми Брюс маълум қилди.

“Бугун кечқурун Вашингтондан Мюнхенга учаётганида котиб Рубио бортида техник муаммо юзага келди. Самолёт ортига қайтди ва Эндрю ҳаво кучлари базасига қайтмоқда”, дейди у.

Унинг сўзларига кўра, Рубио Германияга, сўнгра Яқин Шарққа бошқа самолётда учиб кетиш ниятида.

“Кокпит олд ойнаси билан боғлиқ муаммо Boeing 757 нинг махсус версияси бўлмиш C-32 Вашингтон яқинидаги Эндрю ҳаво кучлари базасидан ҳавога кўтарилганидан тахминан 90 дақиқа ўтгач юзага келган”, деди расмий.

Рубио ва Риш Мюнхен хавфсизлик конференциясида иштирок этишни режалаштирмоқда. Рубио сафарини бошқа самолётда давом эттиришни режалаштираётган бўлса-да, бугун, 14 февраль куни эрталаб Мюнхенда АҚШ вице-президенти Жеймс Дэвид Вэнс ва Украина Президенти Владимир Зеленский билан режалаштирилган учрашувга ўз вақтида етиб кела оладими ёки йўқми, номаълум.