АҚШ БМТ йиғилишига борган Президентнинг визасини бекор қилди

АҚШ Давлат департаменти БМТ Бош Ассамблеясида қатнашиш учун Нью-Йоркка борган Колумбия Президенти Густаво Петронинг визасини бекор қилди. Бунга унинг шаҳарда ўтказилган оммавий чиқишларида гўёки зўравонликка даъват қилгани сабаб бўлган. Бу ҳақда бугун, 27 сентябрь куни АҚШ Давлат департаменти матбуот хизмати хабар берди.

“Колумбия Президенти Густаво Петро Нью-Йорк кўчаларига чиқиб, америкалик аскарларни буйруқларга бўйсунмасликка ва зўравонликка ундашга чақирди. Биз Петронинг визасини унинг ўйламай қилинган ва низо қўзғатувчи ҳаракатлари муносабати билан бекор қиламиз”, дейилади баёнотда. 

Қайд этиш жоиз, АҚШ ва Колумбия иттифоқчи давлатлар ҳисобланади, бироқ Дональд Трамп ҳокимиятга келганидан бери уларнинг муносабатлари совуқлашган. Ҳозирда Вашингтон Кариб ҳавзасида Венесуэлага қарши мўлжалланган наркотиклар билан курашиш операциясини олиб бормоқда. АҚШ Венесуэлани наркокартелларга раҳбарлик қилишда айблайди.

Жорий йилнинг 24 сентябрь куни эса Колумбия раҳбари АҚШ амалдорлари ва Президентига нисбатан Кариб ҳавзасида операция сабабли жиноий иш қўзғатишга чақирди. Бу ҳақда у БМТ Бош Ассамблеясининг 80-сессияси доирасидаги умумий сиёсий мунозарада сўзлаган нутқида баён қилди.

Густаво Петро Америка етакчисини Кариб денгизида сузаётган кемаларга зарба беришга буйруқ берганликда айбламоқда. Колумбия раҳбарига кўра, ўша пайтда кемаларда “фақатгина камбағалликдан қочишни истаган ёшлар” бўлган.

Эслатиб ўтамиз, аввалроқ Дональд Трамп Венесуэладан АҚШ томонга ҳаракатланаётган “наркотеррористлар” қайиғига қарши зарба берилганини маълум қилганди. Унга кўра, АҚШ ҳарбийлари халқаро сув ҳудудида гиёҳванд моддалар олиб кетаётган кемани нишонга олган. Трампнинг сўзларига кўра, кема Қўшма Штатлар томон йўл олган бўлиб, ҳужум оқибатида уч нафар “наркотеррорист” ҳалок бўлган, америкалик ҳарбийларларга эса ҳеч қандай зиён етмаган.