АҚШ Аляскани саммитга тайёрлашда анча тер тўкди

Алясканинг Анкориж шаҳрида АҚШ ва Россия Президентлари Дональд Трамп ва Владимир Путин ўртасидаги саммитга тайёргарлик кўриш АҚШ Махфий хизмати учун ҳақиқий муаммога айланди. Бу ҳақда тўртта манбага таяниб, кеча, 14 август куни “Bloomberg” агентлиги хабар берди.

Анкорижда чекланган миқдордаги меҳмонхона хоналари мавжуд. Автомобиль ижараси бозори ҳам жуда оддий. Шу муносабат билан, транспорт воситалари самолётда етказиб берилади ёки штатнинг бошқа шаҳарларидан келтирилади. Президент кортежи учун машиналар юк самолётларида 48 штатдан олиб борилади.

“АҚШ Махфий хизмати ва Россия консуллиги қисқа муддатли тураржойларни брон қилиш учун Анкориждаги бир риэлтор Бо Дисброу билан боғланди”, деб ёзади агентлик. 

Шаҳар марказидаги меҳмонхоналар тўла. Эскорт кортежларини жойлаштириш учун автотураргоҳлар машиналардан тозаланди. Хавфсизликни таъминлашда Аляска штати полицияси ва шаҳар хизматлари иштирок этмоқда.

Анкориж ўтган йилларда Рим папаси Иоанн Пол II ва АҚШнинг собиқ президенти Рональд Рейганни қабул қилган. Бироқ, Аляска губернатори Майк Данливининг айтишича, жорий саммит шаҳар учун “энг муҳим воқеалардан” бири бўлади.

Бугун, 15 август куни Аляскада Россиянинг Украинага кенг кўламли бостириб кириши бошланганидан бери АҚШ ва Россия Президентларининг биринчи учрашуви бўлиб ўтади. Дональд Трамп ва Владимир Путин АҚШнинг Анкориждаги Эльмендорф-Ричардсон ҳарбий-ҳаво кучлари базасида музокаралар ўтказади.

Россия етакчисининг ёрдамчиси Юрий Ушаковнинг сўзларига кўра, музокаралар таржимонлар иштирокида маҳаллий вақт билан соат 11:30да (Тошкент вақти билан 23:30) Трамп ва Путин ўртасидаги яккама-якка ўтишдан бошланади. Шундан сўнг музокаралар делегация форматида давом этади, шундан сўнг ишчи нонушта ўтказилади.

Россия делегацияси таркибига Ташқи ишлар вазири Сергей Лавров, Ушаковнинг ўзи, Мудофаа вазири Андрей Белоусов, Молия вазири Антон Силуанов, Россия Президентининг хорижий давлатлар билан сармоявий ва иқтисодий ҳамкорлик бўйича махсус вакили Кирилл Дмитриев киради. Музокаралардан сўнг Путин ва Трамп қўшма матбуот анжумани ўтказади.

Музокараларнинг асосий мавзуси “Украинадаги келишув”, жумладан, 6 август куни Кремлда АҚШ Президентининг махсус вакили Стивен Уиткофф иштирокидаги муҳокамалар натижаларини ҳисобга олган ҳолда бўлади. Ушаковнинг сўзларига кўра, тинчлик ва хавфсизликни таъминлаш, икки томонлама ҳамкорлик, хусусан, савдо-иқтисодий соҳадаги кенг кўламли масалалар ҳам муҳокама қилинади.