Абдусатторов билан машғулотлар мени реалликка қайтарди – Карлсен

Жаҳоннинг биринчи рақамли шахматчиси Магнус Карлсен ўзбекистонлик гроссмейстер Нодирбек Абдусатторов билан ўтказган машғулотлар уни реалликка қайтарганини айтди. Бу ҳақда Карлсен жорий йилнинг 7 ноябрь куни UNICEF учун ташкил этилган хайрия тадбирида сўз очди.

“Дунёнинг энг яхши шахматчиларидан бири билан ўйнасанг, бироз реалликка қайтасан”, дейди Карлсен.

Унинг айтишича, интернетда кўплаб блиц партияларини ўйнаш шахматчида айрим зарарли одатларни шакллантириши мумкин. Абдусатторов билан машғулотлар эса бу жиҳатдан фойдали бўлган. Карлсен Нодирбек унда жуда яхши таассурот қолдирганини ҳам қайд этган.

Шунингдек, норвегиялик шахматчи юришларининг тахминан 90 фоизини интуиция асосида амалга оширишини айтган. Унинг сўзларига кўра, кўпинча битта номзод юришни кўриб чиқади, баъзан эса икки ёки учта вариантни ҳисоблайди. Бундан кўпроқ вариантни таҳлил қилишга тўғри келса, бу позициясида муаммо борлигидан дарак беради.

Карлсен янги Total Chess форматини қизиқарли, бироқ бироз ташвишли деб баҳолаган. Шу билан бирга, рапид ва блиц бўйича жаҳон чемпионатининг Туркияда ўтказилиши унинг мусобақада иштирок этиш эҳтимолини оширишини билдирган. Бироқ ҳозирча якуний қарор қабул қилмаган.

Бундан ташқари, шахматчи Лондон тизими ҳақида ҳам фикр билдириб, ушбу дебют аввал ўйлаганидан анча бой ва мураккаб эканини таъкидлаган.

Эслатиб ўтамиз, жорий йилнинг сентябрь ойида Нодирбек Абдусатторов бошчилигидаги Ўзбекистон терма жамоаси 46-Бутунжаҳон шахмат олимпиадаси чемпионлигини қўлга киритганди.