70 минг чет эллик Россияга киритилмади 

Биометрик шахсий маълумотларни йиғиш бўйича эксперимент бошланганидан бери 70 мингга яқин хорижлик чегара ўтказиш пунктлари орқали Россияга ўтказилмади. Мамлакатга кириш учун жами 14 миллион киши биометрик маълумот топширган. Бу ҳақда Россия Ички ишлар вазирлиги матбуот хизмати хабар берди.

Қайд этилишича, эксперимент 2024 йил 1 декабрдан бери амал қилмоқда. Мамлакатга кираётганлар чегара назорати вақтида икки параметр бўйича – фотосурат ва бармоқ излари орқали идентификация қилинади. Улар бевосита ўтказиш пунктларининг ўзида топширилади. 

“Тизим нафақат биометрик маълумотларни йиғишга, балки кириш тақиқланганидан кейин мамлакатни тарк этган, шахсий маълумотларини ўзгартирган ва Россияга қайта киришга уринганларни аниқлашга ҳам ёрдам бермоқда”, дейилади хабарда.

Дастлаб экспериментда Москванинг Шереметьево, Домодедово ва Жуковский аэропортлари, шунингдек, Оренбург вилоятидаги “Маштаково” автомобиль ўтказиш пункти иштирок этган. 2025 йил 1 майдан унга Внуково аэропорти ҳам қўшилган. 2026 йилнинг июнь ойида биометрия йиғиш тизимлари билан яна 11 та ўтказиш пункти – Санкт-Петербург, Новосибирск, Красноярск, Екатеринбург, шунингдек, Олтой ўлкаси, Иркутск, Курган, Новосибирск, Саратов, Оренбург ва Омск вилоятларидаги пунктлар жиҳозланган.

Эслатиб ўтамиз, аввалроқ 2026 йилнинг биринчи ярим йиллигида қонунчиликни бузгани учун Россиядан 43 минг 700 нафар мигрант чиқариб юборилгани ҳақида хабар берилган эди. Бу ўтган йилнинг шу даврига нисбатан 65,5 фоизга кўп.