6805 км ялангоёқ юрган эркак Гиннесга кирди

34 ёшли ирландиялик Эймон Кивни Истанбулдан Ирландиягача оёқ кийимсиз 6 805,83 километр йўл босиб, энг узоқ ялангоёқ саёҳат бўйича жаҳон рекордини ўрнатди. Бу ҳақда “Guinness World Records” хабар берди.

Кивнининг саёҳати Туркиянинг Истанбул шаҳрида бошланган. У 369 кундан сўнг, 7 март куни Ирландиянинг Миё округидаги туғилиб-ўсган Клерморрис шаҳрига етиб борган. Саёҳатчи йўл давомида Туркиядан кейин Болгария, Руминия, Венгрия, Австрия, Германия, Франция, Англия ва Уэльс орқали ўтган.

Кивни ялангоёқ юриш бўйича рекордни бундан аввал 2016 йилда ўрнатган. Ўшанда у Ирландия бўйлаб 2 080,14 километр масофани оёқ кийимсиз босиб ўтган. Бироқ 2024 йилда польяк Павел Дуракевич 3 409,75 километр натижа билан бу рекордни янгилаган.

Янги рекорд учун Кивни оёқларини олдиндан чиниқтирган. У имкон қадар кўпроқ ялангоёқ юриб ва югуриб, оёқ тагидаги терини узоқ сафарга тайёрлаган. Саёҳат давомида эса барча зарур буюмларини рюкзагида ўзи олиб юрган.

Унинг сўзларига кўра, узоқ вақт асфальт йўлларда юриш натижасида оёқ тагидаги тери айрим ҳолларда қонагунча ейилган. Оёқларига тикан ва майда шиша синиқлари кирган. Сафар якунига яқин тиканли бутадан олган жароҳати инфекцияланиб, у бир ҳафта йўлга чиқа олмаган.

Об-ҳаво ҳам саёҳатчига қийинчилик туғдирган. Венгрияда ёзнинг жазирама иссиғи сабаб баъзан бир-икки кун тўхтаб дам олишига тўғри келган. Кейинчалик эса сафарнинг қишки қисмида совуқ билан курашган.

Кивни йўл давомида минглаб одамларнинг ҳайратли нигоҳларига дуч келган. Шунга қарамай, унинг айтишича, одамлар асосан қизиқиш билан муносабатда бўлган ва унга ёрдам беришга ҳаракат қилган.

Туркиянинг шимоли-ғарбидаги Сюлўғли шаҳрида эса маҳаллий аҳоли унга алоҳида кўмак кўрсатган. Кивнини ит тишлаганидан кейин қутуришга қарши эмланиш учун шифохона излаган пайтда бир туркиялик эркак уни уйига қаҳва ва нонуштага таклиф қилган. Унинг набираси эса саёҳатчига шаҳардаги шифохона жойлашган манзилни кўрсатадиган харита чизиб берган.

Кивни бу билан биринчи марта ноодатий рекорд ўрнатаётгани йўқ. 2023 йилда у бир ғилдиракли велосипедда Ирландияни энг тез кесиб ўтиш бўйича эркаклар ўртасидаги рекордни ҳам ўрнатган. У мамлакатни 5 кун 5 соат 23 дақиқада босиб ўтган.

Саёҳатчининг айтишича, бир йил давом этган ушбу сафардан кейин у ҳозирча тикланиш билан банд. Бироқ янги рекорд учун яна бир бор йўлга чиқиш эҳтимолини ҳам инкор этмаган.

Эслатиб ўтамиз, аввалроқ дунёдаги энг “озғин” Fiat автомобили Гиннеснинг рекордлар китобига киргани ҳақида хабар берилган эди.