34 ёшли германиялик футболчи бахтсиз ҳодисада вафот этди

“Штутгарт” жамоасининг собиқ германиялик футболчиси Себастьян Хертнер Черногориядаги чанғи курортида содир бўлган бахтсиз ҳодиса оқибатида 34 ёшида вафот этди. Бу ҳақда “Gala” хабар берди.

Манбага кўра, фожиа жорий йилнинг 20 декабрь куни Дурмитор тоғ тизмасидаги Савин Кук чўққисига олиб чиқувчи чанғи лифтида юз берган. Икки ўриндиқли лифт стулларининг тўқнашуви натижасида Хертнер тахминан 70 метр баландликдан пастга қулаб тушган.

Футболчининг рафиқаси стулда қолиб кетган ва жароҳат олган, у қутқарувчилар томонидан хавфсиз тарзда пастга туширилган. Себастьян Хертнер “Штутгарт” клубининг ёшлар академияси тарбияланувчиси бўлган, Германия ёшлар терма жамоалари сафида 19 та ўйинда майдонга тушган. 

У профессионал фаолияти давомида “Эртсгебирге”, “Дармштадт” ва “1860 Мюнхен” клубларида, асосан, Германиянинг иккинчи дивизионида тўп сурган.

Эслатиб ўтамиз, аввалроқ норвегиялик биатлончи, уч карра Европа чемпиони Сиверт Гутторм Баккен Италиянинг Лавазе шаҳридаги меҳмонхона хонасида ўлик ҳолда топилган эди.