30 ёшли эркак қарзи туфайли қайноқ сув билан ўлдирилди

Россиянинг Санкт-Петербург шаҳрида ҳуқуқ-тартибот идоралари ходимлари 30 минг рубль миқдоридаги қарзи сабабли танишини шафқатсизларча ўлдиришда гумонланаётган икки нафар хориж фуқаросини қўлга олди. Бу ҳақда Россия Федерацияси Тергов қўмитасининг Санкт-Петербург бўйича бош тергов бошқармасига таяниб, Россия ОАВлари хабар бермоқда. 

Тергов маълумотларига кўра, жиноят Ветеранов проспектидаги турар жойда содир бўлган. Гумонланувчилар жабрланувчининг хонадан чиқиб кетиш йўлини тўсиб қўйган ва қарзни зудлик билан қайтаришни талаб қилган.

Эркакнинг қаршилигини синдириш ва пулни тўлашга мажбур қилиш учун ҳужумчилар унинг боши ва танасига қўллари ҳамда оёқлари билан кўплаб зарбалар берган. Шундан сўнг, фигурантлар уни қўрқитиш мақсадида устидан қайноқ сув қуйган.

Олинган оғир жароҳатлар ва куйишлар оқибатида жабрланувчи воқеа жойида вафот этган. Ўлим содир бўлган аниқ вақт, мурданинг топилиш ҳолатлари ва ҳалок бўлган шахснинг шахсига оид маълумотлар тергов манфаатларидан келиб чиқиб ҳозирча ошкор қилинмаяпти.

Содир бўлган воқеа юзасидан тергов органлари томонидан Жиноят кодексининг 105-моддаси (қасддан одам ўлдириш) бўйича жиноят иши қўзғатилган. Иккала гумонланувчи ҳам ушланган, терговчилар ва криминалистлар жиноятнинг барча тафсилотларини ва ҳар бир фигурантнинг иштирок этиш даражасини аниқлашни давом эттирмоқда.

Яқин орада суд тергов органларининг ушланганларга нисбатан қамоққа олиш тарзидаги эҳтиёт чорасини қўллаш ҳақидаги илтимосномасини кўриб чиқади. Тергов ҳаракатлари давом этмоқда.

Эслатиб ўтамиз, аввалроқ Буюк Британиянинг Ҳэмпшир графлигида черковлар олдига қўй ва кийик жасадларини ташлаб юрган 48 ёшли Бенжамин Льюис суд қарори билан мажбурий даволаниш учун руҳий касалликлар шифохонасига жойлаштирилганди.