15 битли калитни бузган хакер биткоин билан тақдирланди

Project Eleven компанияси тадқиқотчи Жанкарло Леллини оммавий квант компьютери ёрдамида эллиптик криптографияга асосланган 15 битли калитни муваффақиятли бузиб киргани учун Q-Day Prize мукофоти – бир биткоин (хабар ёзилаётган вақтда тахминан 77,7 минг доллар) билан тақдирланди. Бу ҳақда Project Eleven компаниясининг X ижтимоий тармоғидаги расмий саҳифасида хабар берилди.

Тадқиқотчи эллиптик эгри чизиқлардаги дискрет логарифмлаш муаммосини ечишга қаратилган Шор алгоритмининг вариацияси ёрдамида 32 767 та вариантни кўриб чиқиб, оммавий калитдан шахсий калитни тиклашга муваффақ бўлган. Айнан мана шу математик асос биктоин ва эфириум каби криптовалюталар, шунингдек, бошқа блокчейн тизимларининг ҳимоясида ишлатилади.

Project Eleven раҳбари Алекс Пруденнинг таъкидлашича, бу каби ҳужумлар учун талаб қилинадиган ресурслар тез суръатлар билан камайиб бормоқда, технологияларнинг қулайлиги эса ошмоқда. Унинг сўзларига кўра, ғолиб иш мустақил тадқиқотчи томонидан давлат лабораториялари ёки хусусий чиплар иштирокисиз, булутли ускуналарда бажарилган. Бу эса бундай ҳужумларнинг амалга оширилиши мумкинлигини кўрсатади ва постквант криптографиясига ўтиш заруратини кучайтиради.

2025 йил сентябрь ойида тадқиқотчи Стив Типпеконник 6 битли калитни бузиб киришни намойиш этган. Бу квант ускуналаридаги ҳужумнинг биринчи оммавий ҳолати бўлган. Янги натижа ушбу соҳани сезиларли даражада олдинга суради. Гарчи реал тизимларда қўлланиладиган 256 битли калитлар даражасигача ҳали катта фарқ мавжуд бўлса-да, эндиликда бу фундаментал эмас, балки муҳандислик муаммоси сифатида қарала бошланди.

Ҳисоб-китобларга кўра, тахминан 6,9 миллион биткоин очиқ оммавий калитларга эга бўлган ҳамёнларда сақланмоқда, бу эса уларни квант ҳужумлари олдида заиф қилиб қўйиши мумкин.